Tàm nùs nhơm ki ngàm mờ ngoh rơngac, mpồl nhơl gùng đơs crih ling klàng neh sồr mpồl teh dùl gơl jơnau đơs crih dà lơgar nàng tơngac Tổng Ƀí thư ồng Nguyễn Phú Trọng – Kwang đơng lam bồ jak ngan, jơh rài kis tài dà lơgar, tài làng bol.

Mờ bơta ngoh rơngac bal mờ bơta pơlai soh ờ git lơh, Kwang geh jơng tàm Ƀộ Cíñ trị, Củ tịc lơgar ồng Tô Lâm, Kwang atbồ Mpồl drơng broă dơ̆ ies tơp ƀồc neh sền jơnau ies ƀồc đơs loh: Ồng sang rài là dùl hoàc huơr dờng ngan, ờ gơtùi bơ tơl wơl bơh Đảng he dê, Jơi bơtiàn he dê, Làng bol he dê. Dà lơgar he roh dùl nă kwang đơng lam bồ jak chài; srơh kộng sản, gơguh jak tàm dunia roh dùl nă cau cribơyai jơnau tàm sră pơ àr jak chài; gơp bơyô dunia roh dùl nă cau bơyô dòn song, cau lơh broă bal đềt mềr; hìu bơnhă, jơi nòi, ƀòn lơgar Đông Hội roh dùl nă cau kòn jak chài. Phan lời wơl bơh Tổng Ƀí thư ồng Nguyễn Phú Trọng dê rơp kis sùm tàm jơnau kah yau Việt Nam, rơp geh tàm pơndờn mờ đòm jăt uă rlau tai tàm broă lơh tam gơl pa; lam lơh gơtùi jơnau kờñ bơt bơtàu dà lơgar Việt Nam ring lơngai, lơngăp lơngai is, tơrgùm dùl, làng bol lơh tờm, pràn kơldang pas sơm, gơguh jak, gơboh gơbài mờ ồng neh kơp kờñ jơh rài kis, pơn đơl pràn phi să.