Ngai do (25/7), Mpồl duh broă Đảng Kộng sản dà lơgar Việt Nam, Quôk hội lơgar Kộng hòa xã hội củ nghĩa Việt Nam, Củ tịc lơgar Kộng hòa xã hội củ nghĩa Việt Nam, Cíñ phủ lơgar Kộng hòa xã hội củ nghĩa Việt Nam, Anih duh broă Mặt trận dà lơgar Việt Nam mờ hìu bơnhă bơyai lơh yŭ rơyùm Dơ̆ ies ƀồc Tổng Ƀí thư Mpồl duh broă Đảng dà lơgar, Ƀí thư Quân ủy dà lơgar ồng Nguyễn Phú Trọng. Dơ̆ ies tơp ƀồc Tổng Ƀí thư ồng Nguyễn Phú Trọng geh lơh mờ bơhiàn dà lơgar ies tơp ƀồc.

Mpồl drơng broă Dơ̆ ies tơp ƀồc geh 35 nă cau bơh Củ tịc lơgar ồng Tô Lâm lơh Kwang atbồ mpồl. Mpồl bơyai lơh dơ̆ ies tơp ƀồc geh 27 nă cau bơh Kwang geh jơng tàm Ƀộ Cíñ trị, Duh broă sùm Ƀan Ƀí thư ồng Lương Cường lơh kwang atbồ mpồl. Dơ̆ ies ƀồc Tổng Ƀí thư ồng Nguyễn Phú Trọng geh bơyai lơh tàm Hìu ies tơp ƀồc dà lơgar sồ 5 gùng Trần Thánh Tông, ƀòn dờng Hà Nội, sơn đờm bơh 7 jơ drim tus 10 jơ mang ngai 25/7/2024 mờ bơh 7 jơ drim tus 1 jơ mho ngai 26/7/2024. Dơ̆ ies ƀồc Tổng Ƀí thư ồng Nguyễn Phú Trọng geh lơh dơ̆ lĕ bal mờ tŭ tơngai do tàm Hìu pơrjum Thống Nhất, ƀòn dờng Hồ Chí Minh mờ tàm ƀòn tờm Tổng Ƀí thư dê tàm xã Đông Hội, kơnhoàl Đông Anh, ƀòn dờng Hà Nội.

Jat jơnau yal ngan ngồn, Mpồl bơyai lơh ies tơp ƀồc rơp lơh gơlik bơta niam, rơndap ai làng bol in mut ies ƀồc Tổng Ƀí thư ồng Nguyễn Phú Trọng. Tŭ lòt ies, làng bol cèng sră kăn kươc làng bol crăp cíp điện tử halà điện thoại geh tơmut VNeID neh ai ngui khà 2 nàng quét mã QR. Kwang àng ƀòn dờng Hà Nội neh rơcang ală bơta pal geh tàm tơl anih crăp măi quét mã QR nàng drơng làng bol in lơh quét mã ƀuơn ƀuài tŭ lòt ies ƀồc Tổng Ƀí thư ồng Nguyễn Phú Trọng.

Hìu bơnhă Tổng Ƀí thư ồng Nguyễn Phú Trọng jơh nùs ưn ngài làng bol, cau lơh broă bal gùt lơgar mờ gơp bơyô dunia neh pơyua jơnau tam pà moat jrùm Tổng Ƀí thư ồng Nguyễn Phú Trọng sang rài. Anih jơnau đơs Việt Nam pờ tơlik jơnau đơs tơn Dơ̆ ies ƀồc Tổng Ƀí thư ồng Nguyễn Phú Trọng mờ jơnau đơs kuơmàng “Tổng Ƀí thư ồng Nguyễn Phú Trọng: Cau bơh làng bol dê, cau bơh jơnau kah yau dê” bơh 6 jơ 50 phuk tus 9 jơ 15 phuk drim ngai 25/7/2024 tàm ală gah pờ tơlik jơnau đơs VOV1, VOV2, VOV3; sơñio rùp tơn tàm gah sơñio rùp VTC1, VOVTV; pờ tơlik tơn tàm Ƀău điện tử VOV, VTC News mờ ală gah pờ tơlik jơnau tàm mạng xã hội.