Tiah pơhìn ồs sa uă brê geh gĭt nền là bă brê ơm tàm ală xã: Mo Rai, Rờ Kơi (kơnhoàl Sa Thầy); Pờ Y, Sa Loong (kơnhoàl Ngọc Hồi). Tàm ù tiah ală xã do geh mờr 20 rbô lồ brê đơr, sơkàr, gle, ñhơ̆t ja, chir den tàng pơhìn gơbàn ồs sa là uă ngan rlau jơh. Bơdìh hơ̆ tai, rlau 240 lồ brê tam bơh nam 2014 tus tŭ do bơh anih do dê kung geh gĭt nền là tiah tờm pơhìn ồs sa brê uă ngan. Mpồl ătbồ Brê dà lơgar Chư Mom Ray gàr sùm 14 anih mờ 21 tiah drơng sền sùm rơcăng sơndră lài ồs sa brê jơh bal ngai kung bè mang. Bal mờ hơ̆, mpồl kung hòi tơrgùm 23 ƀòn dờp bă ătbồ sền gàr brê tus bal broă lơh rơcăng sơndră ồs sa brê.