Bă brê 547A, bơnah brê Kông ty lâm nghiệp Buôn Ja Wầm tàm kơnhoàl Cư̆ Mgar, càr Dăk Lăk ală nhai pa do brê sùm gơtìp mùs kơl. Tàm tiah ngài mờ Anh atbồ sền gàr brê sồ 01 ờ tus 100 thơk sơl, rềp tơn tềng gùng ù, tàm pơgăp 1 lồ brê pa gơtìp mus kơl aniai, chi brê gam gơpừ nah rơnàp. Bơh hơ̆, geh uă tờm chi gơtìp koah kơmhò lài neh chơ̆t ro, geh tờm den chơ̆t rơhời. Ồng Trần Hồng Minh, cau lơh broă tàm Anih atbồ sền gàr brê sồ 01 pà git, ală cau mus kơl brê do ờ ngòt mờ ni sơna mus kơl. Bŭ lah rềp ha là ngài, di lah gam brê là gam gơtìp mus kơl aniai. Tŭ gơtìp gŏ, kơrian den ală cau tŭ lơi kung dră wơl, geh tŭ gam tam jà tai ală cau tus pơhìn, lơh cau sền gàr brê. Să tờm ồng Minh tàm bồ nhai 6 lài do kung neh gơtìp git nđờ jơ̆t nă cau lơh pal mŭt piam tàm hìu sơnơm: “Làng bol kis ntrờn ơm gùt dar tàm brê, sơgràm jơh ù brê den tàng he kung kal ke ngan. Tŭ do gơtìp kal ke ngan, să tờm añ tàm ngai lài lòt lơh broă den gơtìp ală cau tus tàm anih sền gàr lơh pal mŭt piam tàm hìu sơnơm, ală cau do iơh ngan”.

Bal mờ Bă brê 547A, geh uă bă brê ndai tàm Kông ty lâm nghiệp Buôn Ja Wầm brê kung gam gơtìp mus kơl aniai. Broă ờ ngòt, mờ khin ni sơna gŏ loh ngan tàm ală bă brê gơtìp mus kơl rềp tơn tàm ală anih atbồ sền gàr brê, rềp tơn tềng gah ală gơl gùng lòt geh cau lòt sùm. Tàm ală bă brê gơtìp mus kơl, ală phan tam ờ jŏ tơngai bè khoah, tơngời neh geh tam bơrlŭ bal mờ chi che gơlơh bè broă cau sơgràm ù brê đơs là “gơnoar tờm”. Ồng Nguyễn Công Thắng, Kwang atbồ Anih sền gàr brê sồ 03 ngòt rơngơ̆t đơs tus mờ bơta ờ jai tềng đăp mờ broă mus kơl chi brê, sơgràm ù brê. Broă lơh neh glar bòl, ngòt rơngơ̆t mơya priă geh den ờ kơl jăp. Neh 5 nhai do, oh mi lơh broă tàm anih sền gàr brê gơtìp ờ geh priă nhai. Khà cau ơm ờ lơh broă ngai sơlơ geh uă, bơta glar bòl bơh broă lơh ngai sơlơ uă: “Làng bol kis ntrờn tus den mus kơl brê uă ngan, tàm tŭ mpồl lơh broă bơh he dê den ờ uă, lơh kal ke ngan tus mờ oh mi lơh broă. Oh mi lòt lơh broă ờ gal, làng bol den kis mờ lơh broă tàm gùl brê, geh uă tŭ he ờ jai atbồ tơn. Priă nhai den oh mi geh cau 3 tơlăk, geh cau 5 tơlăk, lơh broă den geh bal ngai chờ, ngai rơlô ờ gơtùi ơm ờ. Priă nhai den tŭ do kông ty gam dồs 5 nhai ờ tơm. Geh ờ uă oh mi neh ơm ờ lơh broă tai, rài kis oh mi ờ hềt geh sền gàr tơl”.

Ồng Nguyễn Tất Văn, Kwang atbồ Kông ty lâm nghiệp Buôn Ja Wầm pà git, kờp tus bồ nhai 9, tàm bơnah brê kông ty dê gơtìp 303 dơ̆ mùs kơl aniai chi brê mờ uă ù ơnàng rơlao 96 lồ. Tàm hơ̆ 99% khà dơ̆ mus kơl ờ git cau lơi. Tàm khà 8 rơbô 800 lồ brê geh kông ty atbồ, tŭ do mìng gam di pơgăp 3 rơbô lồ geh brê, mơya gam bă brê ngai sơlơ gơmù uă: “Mus kơl chi brê, gơgràm ù brê tàm bơnah brê kông ty atbồ bơh bồ nam tus tŭ do gơtìp kal ke ngan, ală dơ̆ mus kơl sơlơ gơguh uă. Mùl màl brê tàm Buôn Ja Wầm tŭ do geh uă ngan là brê sar mờ brê neh geh tam chi, den tàng broă mus kơl aniai chi brê gơtìp tàm tơngai ờ jŏ, mơya bă brê geh uă ngan tài khà chi ờ uă mờ chi dềt”.

Ồng Trương Văn Dự, Kwang atbồ mpồl sền gàr brê kơnhoàl Cư̆ Mgar, càr Dăk Lăk pà git, broă atbồ, sền gàr brê tàm Kông ty lâm nghiệp Buôn Ja Wầm gam gơtìp kal ke ngan. Mờ 9 nă kwang bàng, cau lơh broă tờm, mpồl lơh broă bơh kông ty do dê ờ tơl nàng atbồ 8 rơbô 800 lồ brê mờ ù brê. Ală tŭ gơtìp cau mus kơl uă, Mpồl sền gàr brê pal hòi jà tai bơh 7 tus 8 nă kwang bàng tus sền gàr brê Buôn Ja Wầm, mơya mìng geh tơmù geh dùl tơngai ờ jŏ, tŭ mpồl lơh broă sền gàr brê rê den brê gơtìp mus kơl tai. Tŭ do Kông ty lâm nghiệp Buôn Ja Wầm neh lơh gơs kông ty 2 gah, geh cau dùl nă să tus bal mơya ờ hềt gŏ geh cồng nha: “Añ đơs bơta pràn atbồ bơh kông ty tŭ do là ờ pràn mờ ờ pràn ngan, ờ tơl pràn nàng atbồ, sền gàr brê. Tŭ do kông ty rơwah cau mŭt atbồ, sền gàr brê, mơya mùl màl priă nhai gam dồs bè do den ờ geh cau lơi kờñ mŭt tàm do nàng lòt lơh broă. Bol añ kung dan mờ Sở Nông nghiệp geh jơnau dan mờ càr, brê là geh càr jào den tàng pal geh jơnau dan mờ mpồl cau tờm brê tă priă, mpồl lơh broă tơl pràn nàng lơh jăt kơnòl lòt sền gròi mờ kơrian uă ngan cau mus kơl brê”.

Tàm uă nam do tơn brê tàm Kông ty lâm nghiệp Buôn Ja Wầm sùm gơtìp mus kơl, ù brê gơs ù niam bơh cau mus kơl aniai brê dê. Rơlao 5 rơbô 800 lồ tàm khà 8 rơbô 800 lồ neh ờ gam geh brê tai, di pơgăp 3 rơbô lồ gam tai geh chi brê mơya neh ờ pràn tai. Mờ bơta mùl màl gơtìp mus kơl aniai bè do, cau mus kơl ờ ngòt mờ gam lòng adăt boh lam bè tŭ do, brê tàm Buôn Ja Wầm di gơlan ờ geh tai.