Hơ̆ là tơngume geh đơs tàm dơ̆ lùp mờ hơ jơnau lùp bơh pơrjum dơ̆ 16 Mpồl duh broă Làng bol càr Lâm Đồng khoă X dê geh lơh tàm ngai 12/07. Bơh bồ nam tus tŭ do, càr Lâm Đồng lơh glài 15 dơ̆, gơ wèt mờ 21 nă cau gơrềng tus broă lơh ai càn priă bơdìh, ai càn priă sa priă cồng uă, gơguh 9 dơ̆ pơndrờm bal dồ tŭ mờ nam 2023.

Mò Cil Bri, cau ala măt Mpồl duh broă Làng bol tàm kơnhoàl Di Linh, càr Lâm Đồng yal wơl, broă lơh ai càn priă bơdìh, ai càn priă sa priă cồng uă gam gơlik geh kal ke ngan, ờ mìng geh tàm ală tiah drà  mờ gam geh jơh tàm ală ƀòn lơgar tàm tiah sar tiah ngài, tiah làng bol jơi bơtiàn dồ êt nă cau tàm càr dê. Tềng đăp bơta hơ̆, gơ sồr anih lơh broă kwang àng pal tơngguh rlau tai broă lơh rơcăng lài kơryan, tam dră mờ jòi kŭp kơryan cau lơh tìs do. Nàng tơngguh uă cồng nha broă lơh tam dră, lơh glài cau lơh tìs ai càn priă sa priă cồng uă tàm Lâm Đồng, Đại tá ồng Trương Minh Đương đơs là, kờñ ngan pal geh bơta lơh bal bơh jơh ală anih lơh broă cíñ trị dê, bơta pơgồp bal dồ ròt bơh ală anih lơh broă geh gơrềng dê.