VOV4.K’ho- Mpồl tam klac ơruh pơnu dà lơgar Việt Nam mờ Mpồl cau lơh sơnơm kơnòm să dà lơgar Việt Nam pa bơyai lơh dơ̆ ai cau lơh broă Broă lơh cau kơnòm să lơh jat jơnau bơto sồr Bác Hồ, lơh broă dong kờl is tài pràn kơldang să jan mpồl bơtiàn nam 2022 mờ tơngume “Sền gàr pràn kơldang să jan tơnơ̆ kòp Kovid-19”. Tơngai lài ală tiah tàm gùt lơgar kung neh lam lơh ală broă lơh lơh broă dong kờl is tài pràn kơldang să jan mpồl bơtiàn.

Broă lơh Cau lơh sơnơm kơnòm să lơh jat jơnau bơto sồr Bác Hồ, lơh broă dong kờl is tài pràn kơldang să jan mpồl bơtiàn geh lơh bơh ngai 14/5 tus jơh nam do, tơrgùm tàm broă sền gàr pràn kơldang să jan ai làng bol in tơnơ̆ kòp Kovid-19, mờ jơnau kờñ 20 rbô nă cau lơh sơnơm kơnòm să tus bal broă lơh kham, pơlam sền gàr pràn kơldang să jan tơnơ̆ kòp Kovid-19 ai rlau 1 tơlak nă làng bol in; rlau 3 tơlak nă cau geh kham jơh ală bơta mờ pơlam pờ tơlik tàm internet; 100 rbô nă cau geh pơlam, kham kòp tơn.

Broă lơh kung hòi jà cau tàm mpồl, ơruh pơnu tus bal ai is 50 rbô kơldang mhàm, pơn jờng 1 tơlak nă cau tàm mpồl sùm tàp pràn să jan jat krơh Bác Hồ; bơto pơlam, bơto bơtê jơnau git wă ai 100 rbô nă cau lơh broă dong kờl is bè pơlam phan sa tơl pràn mờ jơnau git wă rơcang sơndră kòp. Jơh ală làng bol neh bơtờp kòp Kovid-19 geh pà sră nggal sền gàr pràn kơldang să jan tơnơ̆ kòp Kovid-19. Củ tịc Mpồl cau lơh sơnơm kơnòm să Việt Nam bi Hà Anh Đức pà git: “Broă lơh cau kơnòm să lơh jat jơnau bơto sồr Bác Hồ- Tài pràn kơldang să jan mpồl bơtiàn. Nam do, bol hi kờñ tơrgùm tai, hơ̆ là wèt tus ală cau bơtờp kòp Kovid-19, kung là wèt tus broă lơh wèt hờ pơrjum dờng Đoàn gùt lơgar. Dơ̆ sơn rờp ngui ală măi mok pa bơdìh mờ ală broă lơh kham sơm kòp tơn, bol he geh sồ điện thoại lơh broă sùm, geh dong kờl tơn jŏ tŭ tơngai tus mờ làng bol kờñ dong kờl ngan rlau jơh, bơdìh hơ̆ tai bơh pơlam tơn tàm điện thoại, telehealth nàng pơlam tơn ai làng bol in”.

Kwang atbồ Ƀan Kiñ tế dà lơgar ồng Trần Tuấn Anh đơs tàm dơ̆ ai cau lơh broă

Tus bal dơ̆ lam lơh kâp dà lơgar tàm càr Thừa Thiên-Huế, Kwang atbồ Ƀan Kiñ tế dà lơgar ồng Trần Tuấn Anh đơs niam “Broă lơh cau lơh sơnơm kơnòm să lơh jat jơnau bơto sồr Bác Hồ, lơh broă dong kờl is tài pràn kơldang să jan mpồl bơtiàn” nam do, mờ kung đơs nền: Tàm tơngai tơnơ̆ kòp Kovid-19, kờñ geh uă ngan bơta lơh ngan nàng rài kis làng bol dê tàm bơta bè ờs pa, nàng pràn kơldang să jan mờ nùs nhơm làng bol dê, tàm hơ̆ geh mpồl cau lơh broă geh gàr niam, lơh gơlik tiah ơm kis, bơnàng jă ai ală broă lơh lơh sa kă bro mờ broă lơh mpồl bơtiàn bơh dà lơgar dê geh gàr kơ̆ kơljap mờ pơn jat tai bơtàu tơnguh. Ồng Trần Tuấn Anh đơs nền: “Añ pin dờn mờ nùs nhơm bơceh pa, lam lài, lơh broă dong kờl is, lơh ngan sơrlèt gan tơl bơta kal ke, Broă lơh cau lơh sơnơm kơnòm să lơh jat jơnau bơto sồr Bác Hồ nam 2022 geh lơh geh ală cồng nha neh ai tơlik, mờ git nđờ tơlak nă làng bol geh kham kòp, pơlam, pràn wơl mờ tơnguh pràn kơldang să jan tơnơ̆ kòp Kovid-19. Añ chờ hờp ngan mờ ală jơnau kờñ, jơnau ai tơlik lài mờ ală broă geh jàu wèt tàm tơl nă làng bol. Bơta do ai tơnggŏ gơnoar broă bơh làng bol dê là cau tờm tàm anih lơh broă cíñ trị tàm ală broă lơh mờ tàm ală broă lơh bơh Đoàn ơruh pơnu dê”.

Tàm dơ̆ ai cau lơh broă, rlau 1 rbô 200 nă cau kòp Kovid-19 neh geh kham sac rơ wah, siêu âm, xét nghiệm mhàm, pơlam cih mat sền gàr pràn kơldang să jan sùm bơh ứng zụng bồ tơngoh jak kòn bơnus lơh gơlik bơh Vinbrain dê mờ tổng đài sền gàr pràn kơldang să jan. Di dơ̆ do, Ƀan Ƀí thư Đoàn dà lơgar kung pà 40 bơnah phan ai ală hìu bơnhă geh sră dong kờl bơh dà lơgar mờ ơruh pơnu geh rài kis kal ke; lùp còp, pơn jờng y ƀák sĩ Hìu sơnơm dà lơgar Huế mờ cau kòp lòt kham tơnơ̆ kòp Kovid-19.

Tơngai lài, tàm ală càr, ƀòn dờng tàm gùt lơgar kung neh bơyai lơh ai cau lơh broă “Broă lơh cau lơh sơnơm kơnòm să lơh jat jơnau bơto sồr Bác Hồ”. Ală tiah neh lam lơh kham kòp, sền gàr pràn kơldang să jan tơnơ̆ kòp Kovid-19, pà sơnơm ờ sa priă mờ pà phan ai rlau 50 rbô nă làng bol mờ kơnòm dềt geh rài kis kal ke tàm gùt lơgar in, mờ kung pơlam cih mat kham, sền gàr pràn kơldăng să jan sùm ai rlau 100 rbô nă làng bol cih mat lài in. Tiến sỹ, Ƀák sĩ Nguyễn Tiến Quang, Củ tịc Mpồl duh broă atbồ Hìu sơnơm K (Hà Nội), đơs nền: “Tàm hìu sơnơm K kung geh Mpồl cau lơh sơnơm kơnòm să gơ wèt Mpồl cau lơh sơnơm kơnòm să dà lơgar Việt Nam. Bơh hơ̆, bơdìh mờ broă lơh kham sơm kòp pah ngai bè ung thư, bòm, ală y ƀák sĩ tus bal tàm broă lơh bal, kham pràn kơldang să jan mpồl bơtiàn. Mpồl tam lơh den bol hi geh rơndap tŭ jơ, cau lơh broă tus bal broă lơh do”.

Mpồl cau lơh sơnơm kơnòm să Việt Nam tus bal broă lơh

Lài hơ̆, tàm tơngai kòp Kovid-19 gơlik geh kal ke, “Broă lơh cau lơh sơnơm kơnòm să lơh jat jơnau bơto sồr Bác Hồ, lơh broă dong kờl is tài pràn kơldang să jan mpồl bơtiàn” kung gam geh lơh mờ broă lơh ngac ngả, di mờ broă geh ngan sơndră kòp bơtờp tàm ală tiah, gơ jat bal mờ broă sền gàr pràn kơldang să jan bơh ngài ngui telehealth mờ broă lơh rơcang lài kham kòp tàm mpồl bơtiàn bơh ală Mpồl cau lơh sơnơm kơnòm să tàm gùt lơgar dê. Bơdìh hơ̆ tai, Mpồl hòi jà tă pơgồp geh rlau 130 tơmàn phan bơna dong kờl mpồl lơh sơnơm tàm mpồl lam lài, geh pơn rơ mờ ală broă lơh container pà oxy, container xét nghiệm làm bă tiah mờ kham kòp. Ală mpồl cau lơh sơnơm lòt bal neh hòi jà mờr 20 rbô nă cau lơh broă dong kờl is gùt lơgar, kham, sac rơ wah, pơlam mờ tam gơl kâp kham sơm kòp ai mờr 4 tơlak dơ̆ làng bol in. Sră cih jơnau tơnggit sền gàr pràn kơldang să jan tŭ bơtờp kòp Kovid-19 bơh mpồl dê neh geh tam pà bal mờ rlau 10 tơlak dơ̆ cau tải rê.

Cau mblàng K’Duẩn