Bal mờ ală oh mi là kwang bàng đơng lam bồ, lài do là Kwang đơng lam bồ Đảng, Dà lơgar, Mặt trận dà lơgar Việt Nam.

Đơs tàm dơ̆ bơyai lơh, Thủ tướng Cíñ phủ ồng Phạm Minh Chính đơs sùm, Niam chài sùm là dùl bơta gam sùm, ờ gŏ ơm rlô bơh ală bơta kal ke jơnau kah yau bơh tơl jơi bơtiàn, tơl dà lơgar mờ jơh bal kòn bơnus gùt plai ù dê. Niam chài jơi bơtiàn là hwềng nùs bơh tơl jơi bơtiàn dê, là ală bơta kwơ phan bơna, nùs nhơm mờ jơi bơtiàn hơ̆ bơceh lơh geh tàm jơnau kah yau. Thủ tướng đơs nền, bơta niam chài jơi bơtiàn Việt Nam dê, bal mờ jơnau gĭt nđờ rbô nam- neh sùm mờ rơ̆p là bơta pràn gam sùm bơh jơi bơtiàn dê. Làng bol Việt Nam geh broă pal lơh, kơnòl broă, chờ hờp geh sền gàr, prăp gàr mờ bơtàu tơnguh bơta niam chài jơi bơtiàn kơ̆ kơl jăp jŏ jòng, dipal mờ jơnau tam gơl tŭ tơngai pa dê, hơ̆ là bơta niam chài Việt Nam gơguh jak, bềng uă rài kis niam chài is jơi bơtiàn dê.