Mang òr (09/07), tàm Hìu đơs crih ƀòn dờng Hồ Chí Minh neh bơyai lơh Broă đơs crih tamya Kwơ màng Kah kơlôi tus Tổng Ƀí thư ƀồc ồng Lê Duẩn geh Mpồl Đơs crih tamya Quân khu 7 pơgồp bal mờ Hìu đơs crih tamya jơi bơtiàn Bông Sen bơyai lơh di tơnkah 37 nam Ngai chơ̆t Tổng Ƀí thư ƀồc ồng Lê Duẩn (10/7/1986-10/7/2023). Củ tịc lơgar ồng Võ Văn Thưởng tus bal Broă lơh do.

Broă lơh đơs crih tamya là dơ̆ nàng ală rơnàng tŭ do kah tus mờ ưn ngài dùl nă kwang đơng lam Đảng jăk chài, dong kờl he wă rơlao tai bè rài kis, broă lơh kăc màng bơh Tổng Ƀí thư ƀồc ồng Lê Duẩn dê, tàm hơ̆ uă ngan là nùs nhơm bơh làng bol kis hờ đah jum dà lơgar dê, bơh ƀòn lơgar tờm càr Quảng Trị gơwèt mờ Tổng Ƀí thư ƀồc ồng Lê Duẩn dê. Bơh tŭ sơn đờm tus jơh broă đơs crih tamya, mờ săp đơs niam chài, broă lơh kăc màng bơh Tổng Ƀí thư ƀồc ồng Lê Duẩn ai gŏ geh mùl màl pràn kơl dang, khin cha jăk chài mờ niam bơnĕ ngan. Bơh ală nam nhai ồng kis tàm ƀòn tus tŭ lơh broă tàm bă ù hờ đah jum dà lơgar tŭ ồng là Ƀí thư Khu ủy, hơ̆ sồng tus dơ̆ Tam lơh Hồ Chí Minh kah yau... ndrờm lơh geh gŏ wơl niam bơnĕ ngan.