Di tơngkah kir sơnrai Ngai Kăc màng Nhai 8 pha lin mờ Sơn tờm dà lơgar (02/9), tàm kơnhoàl tiah nhàr dà lơgar Ngọc Hồi, Mpồl tam klac Ơruh pơnu Việt Nam càr Kon Tum pơgồp bal mờ Duh broă sùm Mpồl lơh broă dong kờl is dà lơgar tiah Tây Nguyên bơyai lơh Broă lơh Gùng lòt “Añ kờñ gơboh dà lơgar añ” nam 2023. Broă lơh lơh gơ rề nùs nhơm lam lài tài mpồl bơtiàn mờ pơyua jơnau đơs bè bơta kờñ gơboh ƀòn lơgar, dà lơgar bơh rơnàng kơnòm să dê.

Gùng lòt “Añ kờñ gơboh dà lơgar añ” nam 2023 geh lơh uă broă lơh geh kuơ mờ bơta tus bal bơh rlau 400 nă đoàn viên, ơruh pơnu tus bơh  càr: Dăk Lăk, Gia Lai, Dăk Nông, Lâm Đồng, Kon Tum mờ ƀòn dờng Phan Thiết. Tàm ƀòn Đăk Mế, xã Pờ Y, kơnhoàl Ngọc Hồi, bal mờ bơyai lơh broă lơh niam chài, đơs crih tam ya, tìp mat lơh kwèng mờ làng bol kòn cau Brâu, ală mpồl neh jàu pà 10 kơldung gàr lơngăp lơngai rài kis mpồl bơtiàn ai hìu bơnhă rƀah; pà 250 bơnah phan, geh: kong tàp, sră cih, phan ngui bơsram dong ală oh kơnòm bơsram rơcang mut tàm nam bơsram pa mờ kờp jơh priă ală bơnah phan pà rlau 114 tơlak đông.

Di dơ̆ do, Duh broă sùm Mpồl lơh broă dong kờl is dà lơgar tiah Tây Nguyên jàu pà 400 tờm mắc ca ai hìu bơnhă rƀah jơi bơtiàn dùl êt nă cau in, dong geh tai bơta gơn kơnờm nàng ală hìu bơnhă in tơnguh lơh sa, rơhời brồ guh lik klàs rƀah.