VOV4.K’ho- Drim ngai 17/08, Thủ tướng Cíñ phủ ồng Phạm Minh Chính tus bal broă “Gùng lòt sơnđờm mut lơh broă tam gơl pa, bơceh pa mờ Ngai chờ lơh broă nam 2022” bơh Họk viện Nông nghiệp Việt Nam dê bơyai lơh.

Thủ tướng đơs tàm dơ̆ pơrjum

Đơs tàm broă lơh do, Thủ tướng Cíñ phủ ồng Phạm Minh Chính đơs sùm, bơtàu tơnguh lơh sa suơn sre là dùl tàm ală kơnòl broă dờng màng ngan tàm broă lơh jŏ jòng bơtàu tơnguh lơh sa- mpồl bơtiàn bơh dà lơgar dê. Lơh sa suơn sre neh, gam mờ geh sùm là jrong kơldìng bơh rài lơh sa dê, pơgồp bơnah kơ̆ kơljap rài kis làng bol dê. Thủ tướng kơ̆p kờñ mờ gờm chờ ală cau bơsram dờng geh mat tàm ngai do jòi geh broă lơh di pal mờ broă ờs mờng gah bơto bơtê, bơta jak chài, bơta chài mờ bơta kơ̆p kờñ bơh ală cau bơsram dờng dê; gờm chờ ală cau bơsram dờng bơh Học Viện Nông nghiệp Việt Nam mờ kơnòm bơsram bơh 700 hìu bơsram kấp pe gam jat sền broă lơh do bơh ală gah yal tơngĭt jơnau geh sơnđờm mut lơh broă geh cồng nha mờ geh ală tă pơgồp di pal ai broă lơh bơt bơtàu mờ sền gàr dà lơgar.

Cau mblàng K’Hạnh