Geh lơh bơh ngai 10 nhai 7 tus tŭ do, broă lơh Ơruh pơnu lơh broă nùs nhơm dong kờl Kàl rơlô bơkang tơlir càr Dăk Lăk nam do geh bơyai lơh tàm 9 xã, thị trấn gơwèt 7 kơnhoàl tàm càr Dăk Lăk. Tàm 15 ngai do, mpồl ơruh pơnu lơh broă nùs nhơm dong kờl is kấp càr neh pờ 28 ơdŭ bơsram wơl jơnau bơsram kàl rơlô bơkang ai 700 nă kơnòm bơsram mpồl kấp 1 mờ kấp 2 in; ơdŭ 1 mờ bơto nàng git sră ai làng bol kis tàm xã Ea Hiu, kơnhoàl krông Păc in.

Bơyai lơh 93 dơ̆ pơrjum ơruh pơnu, tìp bal đơs crih tamya tàm ală thôn, ƀòn; pơgồp bal mờ yal mblàng bè ală gùng dà broă lơh, Nghị quyết bơh Đảng, adăt boh lam bơh Dà lơgar dê, pơs wàs kloh niam tiah kis; yal mblàng jơnau git wă bè bơta pràn kơl dang să jan deh dùh mờ ơruh pơnu pa tào in, deh dùh di kơrhia tàm hìu nhă, sơndră mờ bơta ờ niam mpồl bơtiàn. Lơh 17 broă lơh, bơnah broă ơruh pơnu dê bè: Sòl àng gùng ƀòn, lơh niam wơl hìu pơrjum ƀòn; toah wàs rơbòng dà, tam bơkào ơruh pơnu tàm ală gơl gùng, suơn bơkào ơruh pơnu.