Mìng is Broă lơh “Nhai pe tiah nhàr lơgar” kấp Dà lơgar geh bơyai lơh tàm 3 càr: Lạng Sơn, Quảng Trị mờ Kiên Giang. Broă lơh “Nhai pe tiah nhàr lơgar” tơrgùm lơh pràn mblàng yal, bơto bơtê ai Đoàn viên, cau tàm mpồl, ơruh pơnu in bè bơhiàn yau, bơta kờñ gơboh ƀòn lơgar Dà lơgar mờ kơnòl bơh rơnàng kơnòm să dê gơwèt mờ gơnoar tờm, lơngap lơngai tiah nhàr lơgar, bồt bơlào dà lềng.

Tàm do, geh uă phan pà geh kwơ rơ̆p geh Mpồl bơyai lơh jàu pà ai mpồl ling sền gàr tiah nhàr lơgar, làng bol mờ ơruh pơnu, kơnòm pa tàu mờ kơnòm dềt ală tiah rềp nhàr bal mờ 3 càr Lạng Sơn, Kiên Giang mờ  Quảng Trị in, bè: pà phan ai hìu bơnhă cíñ sác mờ kơnòm bơsram geh rài kis kal ke in, pà bồng bi Dà lơgar ai ală hìu bơnhă làng bol sền gàr gùng tiah nhàr lơgar in, dong kờl pà tờm gle ai broă lơh “Tờm gle tiah nhàr lơgar Việt Nam dê”. Ngan là lam lơh ală broă bơt bơtàu “Sòl àng gùng tiah nhàr lơgar”, gùng sơnĕ lòt sền jrong tiah nhàr lơgar, “Hìu bơsram niam bơnĕ ai oh in”, broă lơh “hìu jă brê ai oh in”,... Kờp priă ală phan pà, broă bơt bơtàu, bơnah broă tàm broă lơh là rlau 7 tơmàn 200 tơlak đong.