VOV4.K’ho- Ngai 20/7, mpồl lơh broă bơh Đoàn ơruh pơnu Kộng sản Hồ Chí Minh dà lơgar bơh Ƀí thư Đoàn dà lơgar, Củ tịc Hội đồng Đội dà lơgar bi Nguyễn Phạm Duy Trang lơh kwang atbồ mpồl neh lòt còp, pà phan ală mpồl ơruh pơnu lơh broă dong kờl is kàl rlô bơkang nam 2022 tàm kơnhoàl tiah nhàr dà lơgar Ea Súp, càr Dăk Lăk.

Mpồl lòt còp mờ pà phan ală mpồl lơh broă dong kờl is kàl rlô bơkăng tơlir tàm kơnhoàl tiah nhàr dà lơgar Ea Súp, càr Dăk Lăk

Mpồl neh tus bal dơ̆ bơyai lơh sơn đờm ai ngui broă lơh ơruh pơnu Sòl àng gùng lòt ƀòn lơgar mờ còp, pà phan ală mpồl ơruh pơnu lơh broă dong kờl is kàl rlô bơkăng tơkir tàm ală xã Ia Lôp, Ia R’vê mờ còp tơrñăng kah kơlôi, còp jrong tiah nhàr dà lơgar, pà phan cau ling Pôs ling sền gàr tiah nhàr dà lơgar Ea Hleo. Tàm ală anih tus còp, mpồl neh lùp còp, pơn jờng ală cau lơh broă dong kờl is kàl rlô bơkăng tơlir, tìp mat mờ ală oh dềt mờ cau ling sền gàr tiah nhàr dà lơgar, pà ală bơnah phan kờp priă 2 tơlak 500 rbô đông dong kờl ală mpồl lơh broă dong kờl is.

Cau mblàng K’Duẩn