Càr Dăk Nông geh crơng gơs wơl tàm ngai 01/01/2004. Lòt gan 20 nam bơt bơtàu mờ bơtàu tơnguh, càr Dăk Nông lơh geh uă cồng nha niam ngan tàm ală gah lơh sa – mpồl bơtiàn, sền gàr dà lơgar, sền gàr lơngăp lơngai mờ bơta niam rài kis làng bol, lik bơh bơta càr rƀah, lơyài bơtàu tơnguh. Kờp jơh phan lơh gơs tàm càr tus lồi nam 2023 geh mờr 24 rbô tơmàn đông, uă rlau 12 dơ̆ pơndrờm mờ 20 nam lài; priă lơh geh kờp bal dùl nă cau tŭ do geh rlau 60 tơlak đông, uă rlau 12 dơ̆ pơndrờm mờ tŭ pa crơng gơs wơl.

Tơngkah kir sơnrai 20 nam ngai crơng gơs wơl càr geh càr đah git là broă geh gơtha kuơmàng ngan. Di dơ̆ do, càr lam lơh ală broă lơh nàng mblàng yal, bơto bơtê jrô ơnàng bè bơhiàn kah yau, niam chài càr dê, tơnguh nùs nhơm pơn iờ să, ki ngàm is jơi bơtiàn, lơh kơ̆ kơljap bơta pin dờn bơh ală rơnàng làng bol dê tàm bơta đơng lam bồ bơh Đảng ƀộ, gơnoar atbồ càr Dăk Nông dê.