VOV4.K’ho- Àng drim gờñ ngai 10/3/1975, ală mpồl ling tờm ngan bơh ling klàng he dê dùl ròt rah phàu sò tơm tàm pôs đồng kuơmàng Mai Hắc Đế mờ ală pôs đồng tàm thị xã Buôn Ma Thuột, (tŭ do là ƀòn dờng Buôn Ma Thuột) bơh bol sò tơm dê mờ sơbac mhar ngan ai geh jai phan, pờ gùng ai pha lin tam lơh Buôn Ma Thuột kah yau lơh bơnàng jă nàng wèt tus tơngklàs jơh gùt tiah đah jum, tơrgùm dùl dà lơgar. Tơnơ̆ 47 nam tơngklàs, Buôn Ma Thuột neh tam gơl muh mat jat gùng dà “pa, ngac ngar, niam chài” mờ gơ gơs là tiah drà tờm ngan Tây Nguyên dê.

Đại tá Nguyễn Xuân Thụ, 67 sơnam, là cau tàm Trung Đoàn 25 ling tơngklàs tàm gùl tiah tàm gùl lơgar dê, cau tus bal tơn tam lơh Tây Nguyên nam 1975 tŭ do neh gơ gơs là cau ƀòn dờng dê mờ ồng neh geh tŭ tus bal tơngklàs. Còp anih prap ơn gar phàu, ƀồm mền Mai Hắc Đế tàm sơnah ƀòn Tân Thành, ồng yal, tơnơ̆ tam lơh, tiah do gơtìp ƀồm mền lơh aniai uă ngan, làng bol ơm kis dùl êt mờ rah rài. Mơya tŭ do, Mai Hắc Đế neh gơ gơs là gùng gal cau ơm kis, tam gơl pa, broă kă bro duh hồl ngan. Ù tiah Mai Hắc Đế kung neh gơ gơs tiah tềl kah yau kấp dà lơgar.  Ồng Thụ kah wơl: “Trung đoàn 25 bol hi dê dờp kơnòl lơh kơryan gùng 21 (hơ̆ là gùng dờng 26 bơh Buôn Ma Thuột lòt Nha Trang tŭ do). Mpồl ling bol hi dê tam lơh kơryan uă tàm dòr bơnơm 519, tiah đah tô thị trấn M’Drăk, tŭ do là anih gak Bảo An. Bol he rah phàu bơh àng drim gờñ ngai 05/3, nàng sơn đờm dơ̆ tam lơh rơcang sò tơm thị xã Buôn Ma Thuột. Tàm àng drim gờñ ngai 10/3, mpồl tờm ngan bơh ling tơngklàs dê là Sư đoàn 320 mut tam lơh tơn tàm tiah Mai Hắc Đế tơ nơ̆ hơ̆ sơ gràm ai jơh gùt Buôn Ma Thuột, ai Sư đoàn 10 den tơrgùm lơh pôs đồng kuơmàng Đức Lập (là kơnhòal Dăk Mil, càr Dăk Nông tŭ do), tus mang ngai 11/3 den ală mpồl ling tơngklàs neh lơh tờm jơh ù tiah tam lơh. Dơ̆ tam lơh Tây Nguyên neh ai geh jai pha jơh tơn”.

Ƀòn dờng Buôn Ma Thuột gam wèt tus jơnau kờñ ƀòn dờng ngac ngar, tam gơl pa mờ bềng bơta niam chài

Bơh dùl thị xã gơtìp rài tam lơh lơh aniai, tơnơ̆ 47 nam bơt bơtàu mờ dờng pràn, tus tŭ do, Buôn Ma Thuột neh mờ gam gơ gơs là ƀòn dờng ngac ngar, tam gơl pa, bềng bơta niam chài. Rài kis làng bol dê ngai sơlơ geh bơtàu tơnguh, phan bơna gùng lòt, lơh sơ nơm, bôt bơsram, anih ơm kis... ngai sơlơ geh lơh niam. Ồng Y Siu Byă, kra ƀòn tàm ƀòn M’Duk, sơnah ƀòn Ea Tam pà git: “Lài do rài kis làng bol dê gam uă bòl glar, kal ke mơya tơnơ̆ tŭ geh Đảng, dà lơgar sền gròi den hời rơ hời geh tam gơl niam. Tŭ do, gùng lòt tàm ƀòn geh tuh mờ bê tông jơh tơn, 100% làng bol neh geh ồs đèng nàng ngui, 95% geh ngui dà sàng goh. Tàm ƀòn den geh hìu bơsram, hìu sơ nơm, hìu ròng kơ nòm dềt mờ hìu niam chài ƀòn nàng pơrjum. Ală hìu bơnhă làng bol ndrờm geh rơndeh măi, geh tŭ geh uă hìu bơnhă gam blơi rơndeh oto tơn”.

Buôn Ma Thuột là  tiah drà gal làng bol ngan rlau jơh tiah Tây Nguyên. Ƀòn dờng tŭ do geh mờr 380 rbô nă cau, rlau 40 jơi bơtìan kòn cau oh mi ơm kis bal. Bè phan bơna gùng lòt, tŭ do ƀòn dờng neh geh ƀlàng rơndeh par tàm lơgar mờ gam wèt tus pờ ală gùng par dunia; ală gơl gùng lòt tàm dơlam ƀòn dờng, gùng pleh tiah đah mat tơngai lik, tiah đah mat tơngai mut gùt dar ƀòn dờng kung gam geh lơh sir; phan bơna bơ to bơsram, lơh sơ nơm ngai sơlơ bơtàu tơnguh; 8 xã bơh ƀòn dờng dê kung neh lơh gơs jơnau kờñ dà lơgar bơt bơtàu ƀòn lơgar pa; 13 sơnah ƀòn ndrờm là sơnah ƀòn niam chài; priă lơh geh kờp bal tàm dùl nă cau bơh ƀòn dờng dê geh mờr 100 tơlak đông tàm nam 2021; uă anih lơh sa mờ măi mok, ală rơndap broă lơh hìu ơm tiah drà geh bơcri priă lơh ngai sơlơ uă; Khà gơguh lơh sa kờp bal 5 nam do sùm tàm khà bơh 11 tus 12% tàm 1 nam.

Ồng Nguyễn Đình Trung - Ủy viên Đảng dà lơgar, Ƀí thư Tỉñ ủy Dăk Lăk đơng lam dơ̆ lơh broă mờ Ƀan Thường vụ Thàñ ủy Buôn Ma Thuột bè rơndap broă bơtàu tơnguh ƀòn dờng Buôn Ma Thuột

Ồng Từ Thái Giang – Ƀí Thư Thàñ ủy Buôn Ma Thuột pà git, nàng bơt bơtàu Buôn Ma Thuột gơ gơs tiah drà tờm Tây Nguyên dê, ală kấp, ală gah broă lơh gam bơt bơtàu mờ lam lơh ală kơ cế dipal nàng bơtàu tơnguh jat tơl tŭ tơngai: “Ƀòn dờng gam lơh ngan tă bơsong ală bơta kòl yan bè ù tiah, rơ wah gơ hòi gơ jà cau bơcri priă dipal nàng bơtàu tơnguh lơh sa. Chồl pràn bơto bơtê mpồl kwang bàng, kông cứk, viên cứk geh bồ tơngoh bơsram sră uă nàng gơtùi lòt jat tơngai 4.0 nàng lơh niam wơl sră nggal hàñ cíñ. Tơnguh jơnau git wă bơh mpồl đảng viên, làng bol dê bè bơta kuơmàng tàm broă bơt bơtàu, bơtàu tơnguh ƀòn dờng, lơh gơlik bơta pràn nàng lơh gơs kơ nòl broă ai tơlik”.

Jat ồng Nguyễn Đình Trung – Ƀí thư Tỉñ ủy Dăk Lăk đơs, tàm jơnau pơn dut sồ 67 bơh Ƀộ Cíñ trị dê nam 2019 đơs loh broă rơndap ù tiah bơtàu tơnguh tus nam 2030, broă wèt sền tus nam 2045, ƀòn dờng Buôn Ma Thuột, càr Dăk Lăk geh gơ gơs là tiah drà tờm ngan bơh Tây Nguyên dê, jat gùng dà “ngac ngar, tam gơl pa mờ bềng lìu bơta niam chài”. Nàng gơtùi lam lơh jơnau kờñ do, ală nam do, Đảng mờ dà lơgar neh bơcri git nđờ jơt rbô tơmàn đông nàng lơh ală broă lơh kuơmàng bè: Gùng Hồ Chí Minh gơl lòt gan Dăk Lăk, Hìu sơnơm dờng tiah Tây Nguyên, gùng pleh tiah đah mat tơngai lik, tiah đah mat tơngai mut, lơh niam, pờ ơnàng ƀlàng rơndeh par Buôn Ma Thuột... pơgồp bơnah chồl pràn bơtàu tơnguh pràn kơldang bơh ƀòn dờng dê đơs is  kung bè tiah Tây Nguyên đơs bal. Ồng Nguyễn Đình Trung pà git, Nghị quyết pơrjum dờng Đảng ƀộ cả Dăk Lăk dơ̆ 17, tơngai lơh broă bơh nam 2020 tus nam 2025 kung neh bơt bơtàu mờ đơs loh broă rơndap lơh, kơ nòl broă tờm tàm tơngai tus nàng bơt bơtàu ƀòn dờng Buôn Ma Thuột gơ gơs là tiah tờm Tây Nguyên dê jat nùs nhơm jơnau pơn dut sồ 67 bơh Ƀộ Cíñ trị dê: “Lài ngan là pal tơrgùm rơndap ù tiah Buôn Ma Thuột di mờ rơndap ù tiah bơh càr mờ gùt lơgar dê, mờ kung pơgồp bal nền nòn rơndap ù tiah tơrgùm jơh ală bơta bè bơt bơtàu kung bè rơndap ù tiah tàm tơngai tus. Dơ̆ 2, pal tơrgùm bơcri priă bơtàu tơnguh Buôn Ma Thuột tơl làm, kơ̆ kơljap tàm tơl gah. Pơn jat hơ̆, pal tơnguh bơta pràn tàm dơlam is mờ tơnguh bơta pràn bơh bơdìh mờ priă bơcri bơh dà lơgar dê nàng tơrgùm lơh ală rơndap broă lơh kuơmàng, pleh rah rài, hời rơ hời lơh Buôn Ma Thuột gơ gơs tiah drà tờm bơh Tây Nguyên dê. Mờ dơ̆ 4, bơtàu tơnguh lơh sa- mpồl bơtìan tàm ƀòn dờng Buôn Ma Thuột jat bơta tam gơl pa broă lơh bơtàu tơnguh lơh sa, sền gròi tơnguh cồng nha, bơta niam jơh ală bơta, rơndap sap sèng pal tơnguh hời rơ hời khà gơguh lơh sa mờ măi mok”.

Bơtàu tơnguh ƀòn dờng Buôn Ma Thuột tam gơl pa, ngac ngar, bềng bơta niam chài bơh jŏ tiah do dê

Mờ bơta pràn mùl geh bal mờ bơta lơh ngan bơh jơh gùt anih lơh broă cíñ trị dê, bơta dùl nùs bal bơh ală rơnàng làng bol dê, tàm tơngai ờ jŏ, Buôn Ma Thuột gam hời rơ hời kơ̆ kơljap wèt tus jơnau kờñ gơ gơs tiah drà tờm bơh Tây Nguyên dê. Do geh là dùl tiah drà dipal ngan nàng kis bơh ờ mìng ală càr Tây Nguyên dê mờ gam gơ wèt tus mờ gùt lơgar tai.

Cau mblàng K’Duẩn