Tiah nhơl chờ ƀòn brê bơnơm Mpồl bơtiàn Ko Tam tàm xã Ea Tu, ƀòn dờng Buôn Ma Thuột rơ̆p là tiah geh lơh Dơ̆ pơrlòng bơceh mòn phan niam chài bơh tờm kơphê. Tŭ do, mpồl do gam ờ ru ngan lơh sir ală broă lơh dŭt ndơl nàng rơcăng phan bơna dùl bă niam ngan rlau jơh ai Dơ̆ pơrlòng in kung bè lơh geh jơnau kờñ lòt còp sền, ơm bĭc wơl bơh năc lòt nhơl dê tŭ lòt tus ndo nàng còp sền. Mò Nguyễn Thị Ngọc Anh, Kwang ătbồ Tiah nhơl chờ ƀòn brê bơnơm Mpồl bơtiàn Ko Tam, pà gĭt: Bol añ ờ mìng rơcăng mìng bè bơceh lơh mòn phan niam chài lơm mờ bol añ gam rơcăng anih lòt còp, hìu ơm rlô, sàu sa ơm bĭc wơl. Tŭ do, bol añ gam jal mhar lơh sir 10 nơm hìu ơm bĭc wơl nàng tơnguh jơh tus 26 nơm, jơh ală rbàng, brong dà bol añ neh lơh tai mờ rơcăng ală phan nàng lơh mờ rơcăng ală broă lơh sơnđờm mŭt lơh mờ tơn jơh bơh Dơ̆ pơrlòng dê nàng lơh ai Dơ̆ pơrlòng in di bơngă bơh càr dê, pơgồp bơnah lơh geh bơta kah wơl ai năc lòt nhơl in tŭ tus nhơl chờ tàm càr Dăk Lăk.

Tiah tờm nhơl chờ rbàng yồng Buôn Đôn kung gam lơh bơka wơl tiah lòt còp, rơcăng nàng wă rò năc. Kwơmàng, lài mờ Dơ̆ bơyai lơh chờ kơphê nam do, Tiah tờm do ơm lơh broă hàu rwas nàng sền gàr mpồl rwas hìu bơh càr dê. Ala tàm hơ̆, tam gơl tus broă lơh nhơl chờ đềt mềr mờ rwas, geh ală dơ̆ lòt nhơl niam bơnĕ ngan, bè: năc lòt nhơl geh tus tơn tàm anih nàng triang sền, lùp nàng gĭt bè rwas, lòt còp, cùp rùp bal mờ rwas, ai rwas in sa...Bal mờ hơ̆ năc lòt nhơl gam geh lòt sền ală broă lơh sàl ơm bĭc wơl mang tềng đah ƀòn Bồt, chu ồs lơh sàl, bơyai lơh dròng cing mồng, sa phan sa bơkah pơnrơ is brê bơnơm dờng dê ai năc lòt nhơl in...

Mò Trần Thị Kim Ánh, Kwang ătbồ gah nhơl chờ mờ hìu năc Biệt Điện, là mpồl ătbồ tiah nhơl chờ rbàng yồng Buôn Đôn pà gĭt, tus tơngai tŭ do, 50 cơldŭ bĭc bơh Hìu năc Biệt Điện dê neh geh dan apah jơh. Broă lơh rơcăng ai ală broă lơh tàm tiah nhơl chờ rbàng yồng Buôn Đôn kung neh lơh sir jơh sơl. Broă gàr niam sàng goh phan sa mờ lơngăp lơngai rơndăp tăp sèng kung geh mpồl do sền gròi uă ngan. Mò Trần Thị Kim Ánh, yal: Mpồl bol añ dê kung sền gròi uă ngan tàm broă sàng goh phan sa mờ lơngăp lơngai ală broă ai năc lòt nhơl in. Tàm broă sàng goh phan sa, bol añ kung neh sac rwah ală cau tăc phan sa geh bơngă pin dờn, geh muh mat, phan bơna kă bro geh gĭt anih lơh gơlik loh làng, nàng sền gàr niam sàng goh phan sa ai năc lòt nhơl in. Gơwèt mờ drơng broă ơm bĭc wơl mang tàm tiah nhơl chờ rbàng yồng Buôn Đôn den tàm dơ̆ lơh chờ bol añ rơ̆p bơtơl tai cau sền gàr nàng sền gàr lơngăp lơngai ai năc lòt nhơl in.

 Ƀòn dờng Buôn Ma Thuột là tiah geh lơh ală broă lơh tờm bơh dơ̆ lơh chờ dê. Digơlan, do rơ̆p là tiah tờm wă rò năc lòt nhơl. Là dùl tàm ală hìu năc 4 sơrmañ bơh càr dê, hìu năc Elephants tàm sơnah ƀòn Thắng Lợi neh bềng jơh cơldŭ ơm bơh ngai 09- 11/03. Ală ngai pơn jăt tai tơnơ̆ hơ̆, khà năc dan apah cơldŭ ơm tŭ do kung neh geh tus 90% sơl. Ồng Lê Văn Đức, Kwang ătbồ Hìu năc Elephants pà gĭt, tŭ do hìu năc do neh lơh sir ală broă dềt rơhền ngan rlau jơh nàng năc lòt nhơl in niam nùs tŭ tus mờ Dơ̆ lơh chờ kơphê Buôn Ma Thuột. Ồng Lê Văn Đức, yal: Hìu năc Elephants kung neh rơcăng wil tơl jơh ală broă drơng ala, ală phan bơna măy mok kung neh lơh sir niam jơh sơl, ală phan bơna den jơh ală pal rơndăp tăp sèng jùt ràu wơl gơ in sàng goh ngan, niam bơnĕ ngan, sền gàr niam lơngăp lơngai rơcăng sơndră ồs sa bơrtoh, sền gàr niam sàng goh phan sa. Bơto pơlam wơl jơh ală oh mi in bè ală broă drơng năc. Hìu năc kung pal hơ là ờ gŏ tơnguh giă sơl.

 Jăt mò Nguyễn Thụy Phương Hiếu, Phó Kwang ătbồ Sở Văn hoá, Thể thao mờ Zu lịc càr Dăk Lăk dê yal, digơlan, dơ̆ lơh chờ dơ̆ do geh 40 rbô tus 50 rbô nă năc lòt nhơl. Tus tơngai do, geh rlau 80% hìu năc, anih ơm bĭc tàm ù tiah càr dê neh geh năc dan apah bềng jơh. Nàng lơh geh tơl jơnau kờñ bơh khà năc gơguh uă dê, Sở Văn hoá, Thể thao mờ Zu lịc kung sồr ală mpồl kă bro nhơl chờ, drơng broă nhơl chờ kờp sền wơl jơh ală broă nhơl chờ neh geh, sền swì mờ rơcăng ală bơta, sền gàr niam lơngăp lơngai, bơta iang nùs ai năc lòt nhơl in. Mò Hiếu pà gĭt, càr rơ̆p lơh glài kràñ tàm broă bơsong jơnau tơnguh giă rồn bơklơn năc lòt nhơl. Mò Nguyễn Thụy Phương Hiếu, đơs: Càr kung neh geh sră nggal sồr ai Ủy ƀan Ñân zân ală kơnhoàl, thị xã in bal mờ gah lơh sơnơm, Kụk Ătbồ drà kă bro, Sở Kông thương gàr niam bè giă kung bè là lơngăp lơngai rơndăp tăp sèng, hơ̆ sồng là bè broă lơh rơcăng sơndră kòp bơtờp, sàng goh phan sa. Ai Sở den gơwèt mờ ală tiah nhơl chờ den Sở kung neh geh jơnau sồr ală mpồl lơh jăt niam broă drơng năc, pal gàr tơl jơh ală bơta nàng drơng năc in, ờ gŏ geh bơta tơnguh giă. Broă lơh lòt sền kung geh broă rơndăp lơh sơl nàng lùp sền, lòt sền hơ̆ là lòt sền tàm ală ngai lài, tàm mờ tơnơ̆ dơ̆ lơh chờ do bè broă do.

Bơta rơcăng lài wil tơl bơh ală anih, mpồl lơh sa kă bro mờ ală tiah dê ai Dơ̆ lơh chờ Kơphê Buôn Ma Thuột dơ̆ do in gơn kơnờm rơ̆p cèng tus ai năc lòt nhơl in ală dơ̆ lòt nhơl niam ngan, kah ngan mờ lơngăp lơngai tŭ tus Dăk Lăk tàm ală ngai geh lơh Dơ̆ lơh chờ.