VOV4.K’ho- Ủy ƀan Ñân zân ƀòn dờng Buôn Ma Thuột, càr Dăk Lăk pa pơgồp bal mờ Mpồl Rơndăp ù tiah bơtàu tơnguh tiah drà Việt Nam bơyai lơh Cribơyai jak chài bơtàu tơnguh măt kă bro phan ƀòn dờng Buôn Ma Thuột gơ gơs là “Ƀòn dờng kơphê dunia dê”. Bơh hơ̆, ƀòn dờng geh bơtàu tơnguh nhơl chờ jăt gùng dà ƀòn brê bơnơm, ngui ală bơta kwơ niam chài tiah do dê gơ jăt bal mờ tiah tềl lời wơl dà lơgar dê.

Cribơyai gơhòi gơ jà mờr 300 nă cau ala măt là kwang đơng lam bồ Ƀộ, ngàñ, ală cau jak chài gah lơh sa, nhơl chờ khà dùl bơh jơh gùt lơgar dê mờ ală cau jak chài kwang bàng kâp dờng gơwèt ală gah broă lơh gùng dà broă lơh kơrnoăt boh lam, lơh sa, lơh măt phan kă bro, bơtàu tơnguh tiah drà, gùng dà broă lơh kơrnoăt boh lam, mpồl lơh broă kơphê, nhơl chờ, phan bơna bơta chài măy mok...

Uă jơnau đơs ring bal, là: Ƀòn dờng Buôn Ma Thuột geh anih ù tiah kwơmàng bè cíñ trị mờ lơh sa, tiah tờm bơh tiah Tây Nguyên dê, tiah bơtòm tơrgùm ală jơnau bè ù tiah brê bơnơm geh is, bơta kwơ tiah tềl lời wơl niam chài, kah yau, đơs crih tam ya...Den tàng bè hơ̆, Buôn Ma Thuột geh tơl lơm bè bơta ƀươn nàng gơ gơs là “Ƀòn dờng kơphê dunia dê”. Ồng Lê Đức Huy, Kwang ătbồ dờng Kông ty Trac ñiệm Hữu hạn Một thàñ viên Tăc blơi phan mờ lơgar ndai ngai 2 nhai 9 Dăk Lăk, đơs bè do: Gơtùi đơs ngan là, Buôn Ma Thuột digơlan gơ gơs là ƀòn dờng kơphê dunia dê. Kwơmàng là ƀòn dờng kơphê Robusta. Ngui sa tàm gùt plai ù den geh Arabica mờ Robusta. Việt Nam là lơgar tăc kơphê Robusta uă ngan rlau jơh dunia mờ Dăk Lăk kung là tiah lơh gơlik kơphê Robusta kung là ƀòn dờng lơh gơlik kơhê uă ngan rlau jơh dunia mờ jơnau kah yau mờ tŭ do mờ bơta pràn bè bơta niam den bol he gơtùi lơm đơs ngan là Buôn Ma Thuột là ƀòn dờng kơphê dunia dê.

Anih bơyai lơh dơ̆ cribơyai

Mơya nàng bơtàu tơnguh măt kă bro phan ƀòn dờng Buôn Ma Thuột gơ gơs là “Ƀòn dờng kơphê dunia dê” bè jơnau kơ̆p gơn, ƀòn dờng kờñ pal sền gròi rlau tai tus bơta yal tơngĭt mờ tàm tơrbŏ. Tàm hơ̆, đơs sùm bơtàu tơnguh nhơl chờ ƀòn brê bơnơm gơ jăt bal mờ măt kă bro phan kơphê. Ồng Nguyễn Anh Tuấn, Kwang ătbồ Viện Kơlôi sơnơng nhơl chờ, sồr: Đơs bè kơphê den loh làng là tŭ do bơta pràn là uă ngan, là tiah tờm bơh kơphê dunia dê mơya bơh bơta geh ngan pà gŏ là, bol he ờ hềt geh bơta tàm tơrbŏ bal đah nhơl chờ mờ kơphê, pa geh bal mờ bàr pe broă lơh lơm. Den tàng bè hơ̆, gơtùi lơh gơs tơl ƀòn là dùl anih tus ai năc lòt nhơl in. Bè hơ̆, ngan ngồn lơh ai Buôn Ma Thuột in gơ gơs là tiah tờm kơphê nhơl chờ dunia dê.

Bal mờ gơnoar broă lòt bal mờ càr nàng bơ̆t bơtàu rơndăp ù tiah tiah drà, Phó Giáo sư, Tiến sĩ ồng Lưu Đức Cường, Kwang ătbồ Viện Rơndăp ù tiah tiah drà mờ ƀòn lơgar yal: Tềng đăp bơta tàm pơrlòng pràn ngan đah ală tiah drà tàm ală tŭ mŭt gơrờm bal jơh gùt plai ù, Việt Nam geh gùng dà hòi jà ală tiah drà lơh măt kă bro gơ jăt bal mờ dong bơtàu tơnguh lơh sa bơh tiah drà dê. Nàng lơh măt kă bro phan ai tiah drà in, lài ngan pal gĭt nền tiah drà hơ̆ geh bơta krơi is, geh bơta lơi mùl gŏ is pơndrờm mờ ală tiah drà ndai tàm Việt Nam mờ dunia halà ờ nàng bơh hơ̆ tơnguh bơngă gơ dê gơ gơs mat phan kă bro. Jăt Phó Giáo sư, Tiến sĩ ồng Lưu Đức Cường đơs, Buôn Ma Thuột pal pleh ntoăt jăt broă rề ơnàng nhàr ù tiah mờ lơh aniai rơndăp ù tiah neh mùl geh. Ồng Lưu Đức Cường, đơs: Bơtàu tơnguh tiah drà dùl bă pràn kơldang dilah bol he ờ gròi sền niam rơ̆ ru den geh lơh gơlik bơta gơ aniai sơlơ̆u wơl ai bơta kơ̆p kờñ bol he bơyai ngai do là yal jơnau kơphê tàm ƀòn dờng tiah tờm kơphê Việt Nam dê, tàm rài tơnơ̆ bol he kơ̆p kờñ gơ gơ gơs bơh dunia dê tai. Tàm tŭ bol he gĭt rơndăp tăp sèng bơh ƀòn dờng Buôn Ma Thuột dê loh làng ngan mờ tiah tờm tiah drà gơmŭt ndơ̆p tàm gùl tiah thòng, mờ jơh ală anih lơh broă sa sươn sre glòm gùt dar den jăt añ là broă pơn jăt tai rề ơnàng tiah drà Buôn Ma Thuột kờñ pal kơlôi sơnơng nền. Tàm dơ̆ tam gơl dơ̆ do pal sền wơl bơta kờñ ngan mờ bơta gơtùi lơh jăt ngan ngồn bơh broă hơ̆ dê.

Làng bol Buôn Ma Thuột pơñiờ să bè “Ƀòn dờng kơphê dunia dê”

Bơh dơ̆ cribơyai do, ồng Vũ Văn Hưng, Củ tịc Ủy ƀan Ñân zân ƀòn dờng Buôn Ma Thuột kơ̆p kờñ ală cau mờng chài, ală cau jak chài pơn jăt tai tă pơgồp jơnau đơs, lòt bal mờ ƀòn dờng Buôn Ma Thuột, càr Dăk Lăk rơndăp mòn gơs tiah drà dờng ngan rlau jơh tiah Tây Nguyên gơ jăt bal mờ bơta kwơ niam chài kah yau, ù tiah, tiah tềl lời wơl dà lơgar; bơtàu tơnguh jăt gùng dà pa rài do, tơlir, ƀòn brê bơnơm, rài kis niam chài is lơh geh broă jàu bơh Dà lơgar dê neh sồr tàm Jơnau đơs pơndŭt sồ 67 bơh Ƀộ Cíñ trị dê. Ồng Vũ Văn Hưng, đơs: Cribơyai do jà uă ngan cau mờng chài, cau jak chài nàng lơh gơs ală jơnau kơlôi lơh mờ lơh jăt loh làng tàm rơndăp broă lơh do nàng tơnơ̆ do lơh. Hơ̆ là dùl broă lơh jŏ jòng tŭ Thủ tướng neh kĭ den ală kâp, ală ngàñ bơh dà lơgar tus ƀòn lơgar lam lơh jăt. Bol añ gĭt nền geh pal rơhời bal mờ bơta tus bal bơh làng bol, gơnoar ătbồ, mpồl lơh sa kă bro mờ jơh bal ală tập đoàn lơh sa dờng bơh jơh gùt lơgar, dunia dê tus bal den hơ̆ sồng lơh geh cồng nha broă do.

Ngai 09/07/2020 Cíñ phủ neh ai lơh jăt Kơrnoăt sồ 103 bè Broă lơh broă lơh jăt Jơnau đơs pơndŭt sồ 67 nam 2019 bơh Ƀộ Cíñ trị dê bè bơ̆t bơtàu mờ bơtàu tơnguh ƀòn dờng Buôn Ma Thuột, càr Dăk Lăk tus nam 2030, bơta sền sơnơng tus nam 2045. Tàm hơ̆, jàu Ủy ƀan Ñân zân ƀòn dờng Buôn Ma Thuột in lơh Rơndăp broă lơh bơtàu tơnguh măt kă bro phan ƀòn dờng Buôn Ma Thuột gơ gơs là “Ƀòn dờng kơphê dunia dê”; bơtàu tơnguh nhơl chờ jăt gùng dà ƀòn brê bơnơm, ngui ală bơta kwơ niam chài ƀòn ơm kis bơh yau tàm tiah do gơ jăt bal mờ tiah tềl lời wơl dà lơgar dê dan mờ Thủ tướng Cíñ phủ kĭ.

Cau cih VOV Tây Nguyên- Cau mblàng Lơ Mu K’Yến