Ơm ngài mờ tiah tờm ƀòn dờng Buôn Ma Thuột pơgăp 12 kơi sồ jăt tiah đah jum măt tơngai lik, tơnau dà Ea Kao, gơ wèt xã Ea Kao, ƀòn dờng Buôn Ma Thuột là anih lòt nhơl tiơng pơnrơ, geh gal ngan năc lòt nhơl bơh tàm dơlam mờ bơdìh càr tus bal mờ ù tiah ƀòn lơgar brê bơnơm tơlir niam sàng goh ngan. Ờ huan ngan geh cau lơi gĭt là tiah do là broă lơh bơtơ̆t dơng dà bơh bơta pràn kòn bơnus dê lơh gơs bơh broă bơ̆t kơryan hiòng dà ală dà croh dờng, dềt tàm tiah do nàng drơng dà tuh ai ƀlàng sre xã Hoà Xuân nđiơm gơs ngan in. Broă lơh tơnau dà do geh lơh tơnơ̆ tŭ thị xã Buôn Ma Thuột (hơ̆ là ƀòn dờng Buôn Ma Thuột ngai do) geh tơngklàs. Kỹ sư Nguyễn Quyền, ơm tàm sơnah ƀòn Tân Lợi, ƀòn dờng Buôn Ma Thuột- tŭ hơ̆ geh Ƀộ Bơtơ̆t tơnau dà sồr tus tàm càr Dăk Lăk lơh broă. Ồng Nguyễn Quyền, kah wơl: Añ là cau neh să tờm tơn rơndăp lơh mờ sồr lơh broă lơh tơnau dà do. Kỹ sư Nguyễn Quyền, đơs: Añ geh jàu kơnòl kơlôi sơnơng nàng rơndăp lơh dồ nơm tơnau dà mờ lơh bè lơi nàng geh dà jun rê tus ală tiah tuh. Tơnau dà lơh mìng geh 2 nơm gời lơm den neh gơgơs tơnau dà mờ jun dà mŭt tàm tiah lŏ sre bơh làng bol dê nàng kờñ geh kòi phe. Tơngai hơ̆ pa tơngklàs den tàng kòi phe là kwơmàng ngan rlau jơh.

Bơh ală broă lơh tơnau dà bơh sơnrờp geh lơh mìng mờ bơta pràn kòn bơnus dê lơm, tus tŭ do Buôn Ma Thuột neh geh bơta bơtàu tơnguh mhar mờ pràn, gơgơs là Tiah drà khà I gơ wèt càr bal mờ dồ ròt broă bơ̆t bơtàu kơmàng gơcèng gơnoar kwơmàng kâp kơnhoàl ù tiah mờ dà lơgar. Gùng dờng Võ Nguyên Giáp mờ làng bol Buôn Ma Thuột mờng hòi là gùng dờng đah mat tơngai Lik- Mŭt geh lơh gơs bơh lồi nam 2023 là broă lơh gùng geh lơh dờng ngan rlau jơh tàm ƀòn dờng tiah kơh bơnơm jơnhoa tus tơngai tŭ do, mờ kờp jơh priă bơcri lơh rlau 1 rbô 200 tơmàn đong. Broă ai rơndeh in lòt rê tàm gùng do neh lơh geh gơl gùng lòt song tơn tàm tiah đah mat tơngai Lik- Jum ƀòn dờng dê, pờ tơlik tŭ tơngai pa tàm bơtàu tơnguh phan bơna kung bè lơh sir ală gơl gùng lòt rê tiah drà Buôn Ma Thuột.

Sùm tàm rlau 8 nam sền gŏ broă lơh gùng do, tŭ do, ồng Đặng Công Viên, ơm tàm sơnah ƀòn Tự An, ƀòn dờng Buôn Ma Thuột chờ hờp ngan tŭ ngai pah ngai kung gam lòt rê sùm tàm gùng dờng ơning ơnàng ngan do. Ồng Đặng Công Viên, đơs: Tŭ geh gùng do den làng bol chờ hờp ngan. Bơta do cèng wơl dồ muh mat là ơnàng rơđàih ngan mờ dơ̆ pe tai là geh dong kờl tơnguh geh lơh sa bơh tiah do dê sơlơ gơguh tai.

Tŭ tơngai 49 nam bơtàu tơnguh, Buôn Ma Thuột neh geh tai uă broă bơ̆t bơtàu pa, bơh ală gùng lòt, ai mờ yuh dà, ală gùng che điện thoại, tus sươn nhơl, ƀlàng dờng mờ uă hìu niam chài ndai tàm dơlam ƀòn dờng. Bơta dờng tiah drà sùm geh rề ơnàng; ală bơta bơto bơtê, lơh sơnơm geh sền gròi, bơcri lơh. Muh mat ƀòn dờng bơtàu tơnguh sùm pah ngai gơ hoài dŏ jăt bal bơta tam gơl bè lơh sa, rài kis làng bol. Ƀòn dờng Buôn Ma Thuột geh bă ù geh is rlau 37 rbô 700 lồ, khà kờp làng bol rlau 380 rbô nă, priă lơh geh kờp bal dồ nă cau tŭ do geh rlau 100 tơlak đong dồ nam, jơnhoa mờr bàr dơ̆ pơndrờm mờ kờp bal jơh gùt càr.

Sền gŏ bơta tam gơl bơh ƀòn lơgar dê, ồng Đỗ Thành Tài, ơm tàm lơgar Mỹ mờ làng bol ƀòn dờng Buôn Ma Thuột geh bal dồ jơnau pơñiờ să bè ƀòn lơgar tờm càr Dăk Lăk. Ồng Đỗ Thành Tài, đơs: Tŭ añ lòt den làng bol thôn, ƀòn kung gam kal ke, ñhòt ngan cau, ờ hềt geh ală gùng ƀòn lơgar, tŭ do rê añ gŏ ală broă lơh bơ̆t bơtàu dờng, rài kis làng bol, khà bơtàu tơnguh lơh sa bơh càr he dê là chờ hờp ngan. Añ gŏ gơlơh chờ hờp ngan mờ pơñiờ să ngan tŭ geh rê hờ ƀòn lơgar tờm, bơtàu tơnguh lơh sa mờ tă pơgồp jơnau đơs ai ƀòn lơgar mờ dà lơgar in.

Pơñiờ să bè bơhiàn kăc màng khin cha jak chài bơh jơi bơtiàn dê, bi H’Hương Bkrông, Ƀí thư Thàñ đoàn Buôn Ma Thuột gơlơh bè sền gŏ, rơnàng kơnòm să càr Dăk Lăk gam cơnđòa lòt jăt jơng bèp bi he dê, bơh bơta pràn Kơh bơnơm lơh jăt niam gơnoar broă cau tờm rài tơnơ̆ do tàm bơ̆t bơtàu ƀòn lơgar. Bi H’Hương Bkrông, đơs: Gĭt ưn ngài ală rơnàng bèp, rơnàng bi, rơnàng cau lòt lài neh bơ̆t bơtàu gơs rài ring lơngai, lơngăp lơngai is. Ngai do, gơ wèt mờ rơnàng kơnòm să dan hơ pơn jăt tai lơh ngan tă pơgồp jơh pràn he dê, tă pơgồp bơta pràn kơnòm să nàng tus bal tàm broă lơh bơ̆t bơtàu mờ đòm jăt sền gàr Dà lơgar tàm tŭ tơngai pa.

Tàm Jơnau đơs pơndŭt sồ 67, nam 2019 bè “Bơ̆t bơtàu mờ bơtàu tơnguh ƀòn dờng Buôn Ma Thuột tus nam 2030, wèt sền tus nam 2045”, Ƀộ Cíñ trị neh geh jơnau kờñ bơ̆t bơtàu mờ bơtàu tơnguh ƀòn dờng Buôn Ma Thuột gơgơs Tiah drà tiah tờm tiah Tây Nguyên. Bơh tŭ hơ̆ tus tŭ do, ƀòn dờng mhar ngan ngui mờ lam lơh jăt ală adăt boh lam, broă dong kờl krơi is gơrềng tus ătbồ priă jền, kes priă dà lơgar; jàu kâp ătbồ dà lơgar tàm gah broă rơndăp ù tiah: gơhòi gơ jà bơcri priă; săc rwah mờ gơhòi gơ jà cau jak. Ồng Vũ Văn Hưng, Củ tịc Ủy ƀan Ñân zân ƀòn dờng Buôn Ma Thuột pà gĭt, pơlam gùng bơtàu tơnguh ƀòn dờng tàm tơngai tus rơ̆p tơrgùm jòi mờ ngui priă jền nàng bơsong ală bơta gơkòl, bơta kơryan tàm ală tŭ bơtàu tơnguh; ngui niam jơnau tơl pràn, bơta pràn mờ gơhòi gơ jà priă jền bơcri ai ƀòn dờng in; mơkung, lơh ngan lơh sir gơs bơ̆t bơtàu ƀòn lơgar pa gơguh uă. Ồng Vũ Văn Hưng, Củ tịc Ủy ƀan Ñân zân ƀòn dờng Buôn Ma Thuột, đơs: Sền gròi bơcri priă lơh ală rơndăp broă lơh bè phan bơna gùng lòt, tàm hơ̆, tơrgùm lơh gơs broă yal mờ ală Ƀộ, gah broă dà lơgar in nàng ring bal ală rơndăp broă lơh bơka niam wơl phan bơna tàm tiah do. Bơdìh hơ̆ tai, dan mờ ală Ƀộ, gah broă lơh rơ̆p sền gròi bơcri priă lơh gùng pleh đah mat tơngai Lik bơh ƀòn dờng Buôn Ma Thuột dê nàng lơh geh dồ ròt ală gùng lòt gùt dar ƀòn dờng, gơmù ƀà bơta kơn jơ̆ lòt rê tàm dơlam ƀòn dờng. Pơn jăt tai bơcri priă lơh bơka niam wơl phan bơna tiah drà, tàm hơ̆ là ală chi che, ală gah gùng, sươn nhơl, sươn bơkàu mờ lơh sir jơh ală broă jàu bơh 3 xã gam wơl dê tàm bơ̆t bơtàu Ƀòn lơgar pa gơguh uă mờ ƀòn lơgar pa lơh krơh lài tàm nam 2024.

Buôn Ma Thuột ngai do neh geh ală bơta tam gơl să pràn kơldang, rơhời gơgơs là dồ ƀòn dờng tơlir- sàng goh- niam. Bal mờ bơta sền gròi dong kờl bơh Đảng, Dà lơgar dê, bơta dồ nùs bal, tam klăc bal bơh 40 jơi bơtiàn ơm kis bal tàm tiah do dê, Buôn Ma Thuột ngai do ngan lơh ngan bơ̆t bơtàu nàng gơgơs Tiah drà tơlir- ƀòn brê bơnơm- ngăc ngar- rài kis niam chài is, pơđơl pràn là Tiah drà tiah tờm tiah Tây Nguyên dê.