Càl pồt pràn bal mờ mìu dờng lơh gơbàn hoàc huơr git nđờ jơt nơm hìu tàm Gia Lai
Thứ hai, 13:55, 17/06/2024
Cau mblàng: K’Duẩn/ VOV Tây Nguyên
Cau mblàng: K’Duẩn/ VOV Tây Nguyên
VOV4.K'Ho- Mang ngai 14/6, tàm kơnhoàl Ia Grai, càr Gia Lai gơlik geh càl pồt pràn bal mờ hìu dờng, neh lơh pồ rơkàng 22 nơm hìu làng bol mờ lơh hoàc huơr bàr, pe bă ù tam sầu riêng, kau su, điều.
Jat tơrgùm kờp bơh Cơldŭ lơh broă sa bơtàu tơnguh ƀòn lơgar kơnhoàl Ia Grai, càr Gia Lai dê, càl pồ pràn tàm xã Ia Krai lơh pồ rơkàng 2 nơm hìu, lơh gơ jrùh mờr 1 tấn plai sầu riêng gam mờr pik tơnhàu; xã Ia Khai geh 20 nơm hìu gơtìp pồ rơkàng mờ ală broă lơh dong kờl ndai bè jrong đèng gùng, rơkàng bồ đap hìu… rlau 3 lồ điều mờ mờr 700 tờm kau su gơtìp pừ. Tơnơ̆ tŭ git jơnau yal, kwang đơng lam bồ Ủy ƀan Ñân zân kơnhoàl Ia Grai neh geh mat tàm ală xã mờ sồr gơnoar atbồ tàm ƀòn lơgar ai mpồl ling grăp ƀòn dong làng bol bơsong jơnau gơ lời wơl.
Viết bình luận