VOV4.K’ho- Drim ngai 08/4, Thàñ ủy, Ủy ƀan Ñân zân ƀòn dờng Cần Thơ neh bơyai lơh tìp mat ală cau atbồ hìu phờk, cau geh bồ tơngoh bơsram sră mờ Mpồl drơng gàr ală hìu phờk Nam tông Khmer, cau geh bơngă pin dờn tàm ƀòn dờng Cần Thơ nàng nting bơr sa tềp Chol Chnam Thmay mờ yal bè broă lam lơh broă lơh kòn cau nam 2021, gùng dà ai tơlik lài nam 2022. Nam 2021 là nam geh uă kal ke, bơta lòng tài gơ rềng bơh trồ tiah lơh aniai, kòp Kovid-19 mơya ƀòn dờng Cần Thơ neh ai lài priă jền nàng lam lơh uă broă lơh, rơndap broă dờng nàng ală broă lơh dong kờl kòn cau geh lam lơh wil tơl, geh cồng nha.

Tŭ do, ƀòn dờng gam tơrgùm rơcang lài lam lơh bơtàu tơnguh lơh sa, niam chài, mpồl bơtiàn nàng bơtàu tơnguh ƀòn dờng Cần Thơ; lam lơh Broă lơh jơnau kờñ dà lơgar bơtàu tơnguh lơh sa- mpồl bơtiàn tiah làng bol jơi bơtiàn kòn cau dùl êt nă cau mờ tiah kơh bơnơm tơngai bơh nam 2021 tus nam 2030, kung bè broă rơndap lơh broă lơh kòn cau tơngai bơh nam 2021 tus nam 2030, broă wèt sền tus nam 2045. Do là tŭ niam dờng ngan nàng ală tiah in geh uă bơta ƀuơn nàng gròi sền, tơnguh niam rài kis bơh làng bol jơi bơtiàn kòn cau dùl êt nă cau dê in.

Cau mblàng K’Duẩn