VOV4.K’ho - Ngai òr (28/06), Sở Văn hoá, Thể thao mờ Zu lịc càr Dăk Lăk pơgồp bal mờ Mpồl cau ùr càr bơyai lơh pơrlòng jòi nàng git wă jơnau ngăc ngar adăt boh lam bè hìu nhă bal mờ broă rơcang sơndră mờ tam lơh pù pờng tàm hìu nhă càr Dăk Lăk.

                                               Dơ̆ pơrlòng cau tàm hìu nhă càr Dăk Lăk

Tus bal pơrlòng geh 15 hìu nhă chài rơgơi tàm 12 kơnhoàl, thị xã, ƀòn dờng mờ ală sở, gah lơh broă, mpồl lơh broă, mpồl ling; ala măt mờr 455 rơbô hìu nhă kis tàm càr Dăk Lăk. Ală hìu nhă neh sơrlèt mờ 4 bơnah pơrlòng, tàm hơ̆ geh: yal bè ală cau tàm hìu nhă; pơrlòng bè gùng dà, broă lơh bơh Đảng, adăt boh lam bơh dà lơgar dê geh gơrềng tus mờ broă hìu nhă; pơrlòng đơs mờ hơ jơnau lùp ală bơta gơlik geh tàm rài kis hìu nhă bal mờ pơrlòng bơta jăk chài. Dơ̆ pơrlòng là ƀlàng nhơl geh kwơ nàng ală hìu nhă pơgồp bal rơlao tai ală nùs nhơm tàm gơboh bal đah ală cau tàm hìu nhă, tìp bal, cri bơyai bal broă mờng chài, jơnau git wă, jơnau ngăc ngar tàm rài kis hìu nhă.

Cau mblàng Ndong Brawl