VOV4.K’ho - Lơh jăt Nghị quyết sồ 11 bơh Cíñ phủ bè broă brồ guh wơl mờ tơnguh bơtàu lơh sa mpồl bơtiàn, Ngân hàng Cíñ sác xã hội càr Dăk Lăk gam tơrgùm chồl mhar broă bơcri priă, ai priă ai càn sa priă cồng ờ uă tus mờ cau rơƀah mờ ală cau geh sră dong kờl bơh dà lơgar. Bơh tŭ hơ̆, pơgồp bal tàm broă dong kờl làng bol sơrlèt mờ kal ke, mhar ring niam rài kis, pơgồp bal tàm broă tơl niam ờ do ờ dă rài kis mpồl bơtiàn, chồl pràn broă brồ guh wơl mờ tơnguh bơtàu lơh sa mpồl bơtiàn tơnơ̆ mờ tơngai gơtìp gơrềng tài bơh kòp Kovid-19.

                     Ngân hàng cíñ sác càr Dăk Lăk kĭ hơ bal tàm broă ai càn priă jăt Nghị quyết sồ 11

Nhai 3 nam 2022, geh càn 10 tơlăk đong bơh broă dong kờl kơnòm bơsram, cau bơsram dờng in càn blơi măi vi tính bơh hìu nhă dê, bi Nguyễn Thuấn kis tàm mpồl ƀòn 2, thị trấn Buôn Trấp, kơnhoàl Krông Ana neh blơi mơ 1 nơm măi laptop ai kòn klao gam bơsram ơdŭ 7 in. Bi Thuấn chờ hờp tài bơta do neh tơn jơh bơta kòn pal yòng điện thoại bơh bèp dê nàng bơsram geh pờ tàm internet. Tŭ do, kòp neh gơmù, mơya măi laptop neh blơi gam geh sùm bơta kwơ tài kòn neh git ngui uă anih bơsram tàm internet ndai. Bi đơs là, broă dong kờl kơnòm bơsram, cau bơsram dờng in càn blơi măi vi tính, di pal mờ ală hìu nhă geh broă lơh sa gam gơtìp kal ke in: “Tŭ do bol añ càn 10 tơlăk đong den 1 nhai bol añ mìng tơm 10 rơbô đong, tơngai ai càn den geh Cíñ phủ ai là 36 nhai, tàm hơ̆ geh 6 nhai tơm dùl dơ̆. Añ kơlôi là geh uă hìu geh rài kis kal ke den geh càn priă do geh kwơ ngan ai hìu nhă in”.

Mai vi tính blơi bơh priă geh càn sa priă cồng ờ uă jăt Nghị quyết sồ 11 neh dong kờl kơnòm bơsram sơrlèt mờ kal ke tàm tơngai bơsram tàm internet tŭ tam cah mpồl bơtiàn tài bơh kòp Kovid-19

Kung geh càn bơh priă càn jăt Nghị quyết sồ 11 dê, bi Nguyễn Nam Giang, kis tàm kơnhoàl Krông Ana pà git: Mờ khà priă geh bơh ùr bơklao bi dê tŭ do, nàng prăp tềm lơh geh hìu ơm kung pal roh tơngai jŏ ngan. Den tàng, bơh tŭ git jơnau yal bè broă ai càn priă sa priă cồng ờ uă jăt Nghị quyết sồ 11 bơh Cíñ phủ dê, bi neh lơh sră nàng càn 450 tơlăk đong, ndrờm mờ 50% khà priă kờñ geh lơh hìu, priă cồng mìng 4,8% tàm 1 nam. Kơnờm mờ broă geh càn priă sa priă cồng ờ uă, hìu nhă bi neh lơh geh hìu pa, rài kis geh niam. “Kơnờm mờ broă geh càn bơh priă do, den tàng añ geh priă lơh hìu, gơwèt mờ broă tơm priă cồng bè hơ̆ den kung ờ uă nàng lơh geh hìu ơm”.

                                                 Hìu geh lơh mờr gơs bơh bi Giang dê

Tàm dơ̆ do, anih lơh broă Ngân hàng cíñ sác xã hội kơnhoàl Krông Ana geh tam pà mờr 7 tơmàn đong nàng lơh jăt broă ai càn jăt Nghị quyết sồ 11 bơh Cíñ phủ dê. Kờp tus tŭ do, ngân hàng neh bơcri broă dong kờl broă lơh mờ geh sùm broă pờ ơnàng broă lơh ai 53 nă cau in mờ khà priă rơlao 2 tơmàn 400 tơlăk đong; bơcri broă dong kờl ai kơnòm bơsram, cau bơsram dờng in càn blơi măi vi tính ai 2 nă cau in mờ khà 20 tơlăk đong; bơcri ai càn broă dong kờl lơh hìu ơm mpồl bơtiàn 2 nă cau in mờ khà priă 770 tơlăk đong. Ồng Bùi Quang Tuyên, Kwang atbồ anih lơh broă Ngân hàng cíñ sác xã hội kơnhoàl Krông Ana đơs: “Anih lơh broă neh geh Ngân hàng jào mờr 7 tơmàn đong, tàm nhai 5 den bơcri mờr 100% khà priă geh jào. Ală khà priă jăt Nghị quyết sồ 11 do den neh di tŭ dong kờl ai hìu làng bol gơtìp kal ke tài bơta kòp gơtờp di pal mờ broă kờñ càn nàng pơn jăt tai broă lơh sa kă bro nàng brồ guh lơh sa hìu nhă”.

Jăt khà kờp bơh Ngân hàng Cíñ sác xã hội càr Dăk Lăk yal, càr neh geh Dà lơgar tam pà rơlao 71 tơmàn đong nàng lơh jăt broă ai càn sa priă cồng ờ uă jăt Nghị quyết sồ 11, tàm hơ̆ geh: ai càn priă dong kờl broă lơh, geh sùm mờ pờ ơnàng broă lơh; ai càn lơh hìu ơm mpồl bơtiàn mờ ai càn kơnòm bơsram, cau bơsram dờng geh rài kis gơtìp kal ke nàng blơi măi vi tính, phan drơng tàm broă bơsram sră bơh broă bơsram tàm internet. Tus tŭ do, gùt càr neh bơcri rơlao 52 tơmàn đong ai càn bơh khà priă do. Pa do ngan, càr Dăk Lăk pơn jăt tai geh Dà lơgar jào tai mờr 260 tơmàn đong ai càn sa priă cồng ờ uă jăt Nghị quyết do nàng lơh jăt broă ai càn jăt jơnau kờñ dà lơgar bè tơnguh bơtàu lơh sa mpồl bơtiàn tiah làng bol kòn cau mờ tiah kơh bơnơm tơngai bơh nam 2021 tus 2030 mờ ai càn gơwèt mờ ală hìu bơsram mầm non, hìu bơsram kấp 1 bơdìh mờ dà lơgar lơh gơtìp gơrềng bơh kòp kovid-19.

Ồng Nguyễn Minh Hướng, Phó Kwang atbồ Ngân hàng Cíñ sác xã hội càr Dăk Lăk pà git, nàng khà priă di tŭ tus mờ ală cau geh dờp, tơnơ̆ mờ tŭ Thủ tướng tơlik geh Nghị quyết sồ 11 bè broă brồ guh wơl mờ tơnguh bơtàu lơh sa tơnơ̆ mờ kòp kovid-19, Ngân hàng dan mờ UɃÑZ càr geh sră nggal nàng lơh jăt Nghị quyết do. Ngân hàng Cíñ sác xã hội càr kung pơgồp bal mờ ală gah, mpồl lơh broă tàm càr nàng sền wơl ală cau, tơrgùm bơcri priă mhar, di tŭ, loh làng. Bal mờ hơ̆, ngân hàng geh sền, sền gròi mờ pơlam, bơto sồr nàng ală cau càn priă ngui priă di jơnau kờñ, geh cồng nha: “Tơnơ̆ mờ tŭ geh jơnau yal bè khà priă ai càn den Ngân hàng neh dan mờ UɃÑZ càr geh sră nggal đơng lam ală anih lơh broă, mpồl lơh broă nàng bal mờ Ngân hàng sền wơl ală cau kờñ càn priă. Tơnơ̆ mờ tŭ geh khà măt mùl màl, Ngân hàng Cíñ sác xã hội đơng lam anih lơh broă tàm ală kơnhoàl pơgồp bal mờ ală gah, mpồl lơh broă tàm kơnhoàl nàng lơh jăt broă ai càn priă mhar ngan, di cau mờ di jơnau kờñ”.

Tàm tơngai kal ke tài gơrềng bơh kòp Kovid-19, khà priă ai càn sa priă cồng ờ uă jăt Nghị quyết sồ 11 là “bơta tờm” geh wơl lơh bơnàng jă gơguh, tơnguh bơtàu lơh sa, bơsong broă lơh mờ ală broă tàm mpồl bơtiàn ndai, pơgồp bal tàm broă ai lơh sa mpồl bơtiàn tàm càr Dăk Lăk brồ guh wơl, tơnguh bơtàu.

Cau mblàng Ndong Brawl