VOV4.K’ho - Geh uă bơta pràn, bơta kwơ nàng tonguh bơtàu, mơya tus tŭ do nhơl chờ càr Dăk Lăk kung gam ờ pràn jăt mờ jơnau kơ̆p kờñ. Càr Dăk Lăk gam lơh ngan pờ ơnàng broă tơrbŏ bal, jơh bal tàm dơlam càr mờ ală càr ndai nàng lơh geh bơta pràn ai nhơl chờ tàm càr tơnguh bơtàu.

                      Càr Dăk Lăk kĭ hơ ring bal tơnguh bơtàu nhơl chờ mờ uă càr, ƀòn dờng ndai

Quảng Bình là dùl tàm ală càr pa geh tơrbŏ bal nhơl chờ mờ càr Dăk Lăk tài geh ală bơta ndrờm bal bè tiah brê bơnơm, ù tiah niam. Pa do, bàr càr neh cri bơyai uă tơngu me bè broă kơlôi sơnơng drà kă bro, pờ gùng par Đồng Hới mờ Buôn Ma Thuột mờ uă tơngu me lơh broă bal ndai tàm 5 nam tus. Ồng Đặng Đông Hà, Phó Kwang atbồ Sở Zu lịc càr Quảng Bình đơs là, càr Dăk Lăk mờ càr Quảng Bình geh bal nùs nhơm kơ̆p kờñ tơnguh bơtàu nhơl chờ tơlir, ơm rơlô să, mơya kung geh uă bơta krơi is nàng geh sùm, bơ̆t bơtàu gơs ală khà măt nhơl chờ geh bơta kwơ: “Bal mờ broă bơ̆t botàu phan nhơl chờ den chồl pràn broă yal mờ tơrbŏ bal. Tŭ do den broă tam gơl sồ den yal, tơrbŏ bal, marketing geh kwơ màng ngan. Mờ broă dŭt ndơl tai là ală mpồl lơh sa kă bro kung rơcang mờ ală anih lơh broă atbồ dà lơgar kung tơnguh broă atbồ dà lơgar nàng atbồ niam ală phan geh is nhơl chờ, mờ kung ai geh bơta niam ală mpồl lơh sa kă bro in tơnguh bơtàu nhơl chờ niam rơlao”.

                                                Càr Dăk Lăk geh uă ù tiah geh is niam

Lài mờ hơ̆, tàm nhai 3 nam 2022, Sở Văn hoá-Thể thao mờ Zu lịc càr Dăk Lăk neh pơgồp bal mờ Sở Zu lịc càr Khánh Hoà bơyai lơh pơrjum hòi jà, yal mờ tơrbŏ bal phan nhơl chờ. Mò Nguyễn Thị Lệ Thanh, Kwang atbồ Sở Zu lịc càr Khánh Hoà pà git: jơh bàr càr ndrờm geh bơta pràn is nàng tơnguh bơtàu ală bơta phan nhơl chờ, di lah bè càr Khánh Hoà geh bơta pràn bè nhơl chờ tàm dà lềng, bồt dà lềng den càr Dăk Lăk geh bơta pràn mờ nhơl chờ tàm brê bơnơm, ù tiah niam, brê bơnơm dờng. Do là broă bơtơl niam ngan ai bàr càr in, ai geh ală dơ̆ nhơl chờ uă bơta bè phan nhơl chờ mờ ală broă tus sền niam cau năc dê. “Bol añ geh đơng lam ală kông ty nhơl chờ kung bè là pơgồp bal mờ Mpồl nhơl chờ Nha Trang-Khánh Hoà sùm tơrbŏ bal nàng lơh jăt broă tơrbŏ bal tiah, tam gơl sùm, geh ală broă tơrgùm ing, tơrgùm bal nàng sền wơl broă mờng chài. Tàm tơngu me hơ̆, Sở Zu lịc kung geh tơrgùm jơnau đơs mờ geh ală broă lơh jăt pơn jăt tai nàng geh cồng nha rơlao kơnòl tơnguh bơtàu broă tơrbŏ bal tiah đah càr Khánh Hoà mờ càr Dăk Lăk”.

               Bơta chài rơgơi geh uă, uă bơta niam chài bơh jơi bơtiàn kòn cau kis bơh yau tàm tiah do

Bal mờ bơta pràn bơh ù tiah niam geh is, càr Dăk Lăk gam là tiah tàm gùl Tây Nguyên dê, den tàng ƀuơn ngan nàng tơrbŏ bal nhơl chờ mờ ală càr tàm tiah do, tàm hơ̆ uă ngan là mờ càr Lâm Đồng, do là càr neh bơ̆t bơtàu geh khà măt nhơl chờ geh pơnrơ ngan. Mò Nguyễn Thị Bích Ngọc, Phó Kwang atbồ Sở Văn hoá – Thể thao mờ Zu lịc càr Lâm Đồng pà git, bàr càr gam lơh ngan tơmù ală bơta kal ke bè gùng lòt, nàng nhơl chờ mùl màl geh tơrbŏ bal: “Tŭ do lòt bơh càr Lâm Đồng tus càr Dăk Lăk gùng jòng mờr 200 kơi sồ, gùng lòt gơtìp kal ke ngan. Bàr càr gam dan lơh rơndăp broă lơh gùng ntoăt jờl bơh càr Lâm Đồng tus càr Dăk Lăk, bơh tŭ hơ̆ geh tơrbŏ bal mờ ală càr tàm Tây Nguyên. Mờ kơ̆p kờñ ngan là gờñ geh lơh niam wơl, mờ lơh pa gùng lòt, ai geh bơta niam ngan nàng cau năc nhơl chờ tus 5 càr Tây Nguyên. Dùl broă tai hơ̆ là bơ̆t bơtàu dùl khà broă ring bal bè nhơl chờ geh bơta niam uă, mờ bơ̆t bơtàu tơn khà broă nàng sền wơl bè ală broă nhơl chờ bơh bàr càr dê”.

Jăt ồng Đặng Gia Duẩn, Phó Kwang atbồ Sở Văn hoá – Thể thao mờ Zu lịc càr Dăk Lăk yal, mờ 49 jơi bơtiàn kòn cau gam kis bal tàm càr, Dăk Lăk geh dùl bơta chài rơgơi uă bơta mờ niam bơnĕ ngan. Tơngai pa do, càr neh geh uă rơndăp broă lơh mùl màl gơrềng tus mờ broă tơnguh bơtàu nhơl chờ, prăp gàr mờ tơnguh bơta kwơ ală tiah tềl kah yau rài lài do kung bè Nghị quyết jăt tơngu me bè prăp gàr bơta chài rơgơi cing mồng. Pơrjum dờng Đảng ƀộ dơ̆ 17 càr dê kung neh ai broă tơnguh bơtàu nhơl chờ là dùl tàm ală kơnòl tờm ngan. Do là ală gùng dà broă lơh nàng tơrbŏ bal tơnguh bơtàu bơta chài gơrơi mờ tơnguh bơtàu nhơl chờ tàm càr dê. Ồng Đặng Gia Duẩn đơs: “Bol añ geh lơh ngan lơh jăt ală bơnah broă geh ai lài, ală broă lơh lơi, ală anih lơi gơtùi tơnguh niam nàng hòi jà geh cau năc nhơl chờ den geh ai lài bơcri priă lơh, hòi jà ngai sơlơ gal rơlao cau năc nhơl chờ mờ uă gah bơcri priă tàm càr bơh ală broă lơh do. Gam càr Dăk Lăk krơi is mờ ală càr ndai geh bơta lơi? Là pal đơs bè bơta chài rơgơi bơh làng bol ală kòn cau kis tàm càr dê, tàm hơ̆ geh uă ngan ală jơi bơtiàn kòn cau kis bơh yau, geh bơta chài rơgơi niam bơnĕ mờ pơgồp bal mờ broă tơnguh bơtàu nhơl chờ, bol añ kơ̆p kờñ priă geh bơh broă tơnguh bơtàu nhơl chờ, geh pơgồp bal kwơ màng tàm GDP càr dê tàm tơngai tus”.

Mờ uă bơta geh, bơta pràn nàng tơnguh bơtàu uă bơta nhơl chờ, càr Dăk Lăk gam geh ală broă lơh nàng lơh mờ tơnguh bơtàu nhơl chờ pràn kơl dang. Tàm hơ̆, broă chồl pràn tơrbŏ bal, pơgồp bal mờ ală càr, ƀòn dờng tàm gùt lơgar geh kơ̆p kờñ ai geh bơta pràn broă nhơl chờ in, dong kòl gah lơh sa do in gơtùi ai geh uă bơta kwơ rơlao ai broă tơnguh bơtàu lơh sa, mpồl bơtiàn tàm càr in.

Cau mblàng Ndong Brawl