Ngai 30 nhai 12 nam 2023, Thủ tướng Cíñ phủ neh kĭ rơndăp ù tiah bal càr Dăk Lăk tơngai bơh nam 2021 tus 2030, wèt tus nam 2050. Jăt rơndăp ù tiah geh ai, nam 2030 càr Dăk Lăk gơs anih tus niam chài, niam bơnĕ ngan cau năc lòt nhơl tàm lơgar mờ dunia dê; ƀòn dờng Buôn Ma Thuột là dùl tiah bơtàu tơnguh pràn tiah Tây Nguyên dê, tơrgùm bal mờ pơgồp bal jăt broă lơh pờ mờ tiah do bal mờ dunia; lơh pràn broă tam gơl lơh sa jăt gùng dà gơguh jăk, tơnguh bơta kơl jăp tàm broă bơtàu tơnguh. Tàm hơ̆, lơh ngan ai khà gơguh pah nam tơngai bơh nam 2021 tus 2030 là 11% tàm 1 nam; GRDP tơl nă làng bol nam 2030 geh rơlao 130 tơlăk đong. Ală jơnau kờñ do geh ai là di pal tàm tơngu me pơlam jơnau đơs bơh uă cau jăk chài, cau khoa họk, cau atbồ ală ƀộ, gah lơh broă dà lơgar bal mờ ală tiah mờ làng bol ală jơi bơtiàn tàm càr dê.

Ồng Võ Ngọc Tuyên, Kwang atbồ Sở Kế hoạc – Đầu tư càr Dăk Lăk pà git: “Rơndăp ù tiah càr Dăk Lăk ai tơngŏ geh cồng nha bơh bơta ngăc ngar mpồl, nùs nhơm geh kơnòl bơh jơh ală mpồl lơh broă cíñ trị mờ làng bol kis tàm càr dê. Dơ̆ bàr gơtùi đơs rơndăp ù tiah càr Dăk Lăk dơ̆ do geh bơyai lơh nền nòn, lơh di tàm ală gùng dà broă lơh bơh dà lơgar, jơnau kơlôi sơnơng iăt geh rơwah jơnau mờng chài bơh dunia mờ dà lơgar, ngui di pal mờ bơta tàm mùl màl bơh càr dê tàm tơngu me hơ̆ lơh niam ală bơta geh, bơta kwơ mờ yal lài kal ke, bơta lòng tàm tơngai tus. Bơh tŭ hơ̆ ai geh kơnòl broă lơh nàng geh ală broă lơh di pal nàng lơh jăt niam broă rơndăp ù tiah”.

Wèt tus nam 2050, càr Dăk Lăk gơs càr geh bơta niam ù tiah kơh bơnơm, bơta niam chài, tơrbŏ bal bơceh lơh, là anih tus kờñ gơboh, pal kis ngan. Brồ guh tàm mpồl 25 càr bơtàu tơnguh pas sơm lam lài gùt lơgar dê. Ƀòn dờng Buôn Ma Thuột là “Ƀòn dờng kơphe dunia”, tiah tờm tiah drà Tây Nguyên, tiah tờm niam chài, prăp gàr uă bơta siñ họk tiah Tây Nguyên mờ tiah pe mum bơtàu tơnguh Việt Nam – Lào – Campuchia dê, tiah tờm kơlôi sơnơng ngui khoa họk mờ kông nghệ lơh sa suơn sre dunia dê. Nàng lơh geh bơta do, jăt ồng Vũ Văn Hưng, Củ tịc UɃÑZ ƀòn dờng Buôn Ma Thuột, càr Dăk Lăk đơs bè do: “Jăt tàm rơndăp ù tiah càr dê, ƀòn dờng Buôn Ma Thuột geh lơh mhar broă lơh wơl rơndăp ù tiah bal ƀòn dờng Buôn Ma Thuột dê jăt gùng dà broă lơh bơh Thủ tướng neh ai lơh. Mờ bơyai lơh jăt Nghị quyết sồ 07 bơh Thủ tướng dê bè ngui gùng dà broă lơh krơi is gơwèt mờ ƀòn dờng Buôn Ma Thuột tàm ờ uă rơndăp broă, broă lơh kwơ màng  neh geh yal UɃÑZ càr in nàng yal Ủy ƀan Thường vụ Tỉñ ủy nàng bơh tŭ hơ̆ geh lơh ală broă pơn jăt tai. Dơ̆ bàr, ai bơh tàm rơndăp ù tiah bal den ƀòn dờng geh lơh khà măt bơcri priă nàng yal càr in geh ai tàm khà măt bơcri priă tàm ƀòn dờng geh tơnguh broă atbồ ù tiah lơh nàng atbồ niam ală tơngu me neh geh kĭ tàm rơndăp ù tiah. Tàm tơngu me hơ̆ ai geh bơta ƀuơn ală cau bơcri priă mờ ală mpồl lơh broă in lơh jăt rơndăp ù tiah tơnơ̆ do”.

Jăt ồng Nguyễn Tuấn Hà, Phó Củ tịc Thường trựk UɃÑZ càr Dăk Lăk đơs, ală jơnau kờñ bal mờ nùs nhơm kơlôi sơnơng jŏ jòng tàm Rơndăp ù tiah càr dê là tơngu me cíñ trị, tơngu me adăt boh lam kơl jăp ai geh uă bơta niam pa, bơta kơ̆p kờñ ai broă bơtàu tơnguh pràn, mhar mờ kơl jăp. Nàng rơcang dờp bồ ală ală bơta niam, càr neh ai geh 4 kơnòl broă tờm, hơ̆ là: bơ̆t bơtàu wơl ală gah lơh sa suơn sre, lơh sa mờ măi mok; bơtàu tơnguh mpồl tiah drà; lơh, ngui di pal phan geh is; tơnguh broă tơrbŏ bal tiah, ală càr; mờ 5 broă lơh pràn tàm hơ̆ geh: lơh niam wơl sră nggal, tiah bơcri priă kă bro; tơrbŏ bal gùng lòt; bơtàu tơnguh, ngui khoa họk kông nghệ mờ tam gơl pa bơceh lơh; ai geh bơta pràn tờm ngan, tơl ală bơta bè bơtàu tơnguh bơto bơtê, bơsram mờ lơh sơnơm; bơ̆t bơtàu phan bơna ndrờm bal, pa. Ồng Nguyễn Tuấn Hà pà git: “Thủ tướng Cíñ phủ kĭ rơndăp ù tiah càr Dăk Lăk neh ai geh ală bơta niam bơtàu tơnguh pa mờ ai geh ală bơta kwơ pa càr in. Tàm tơngu me atbồ di pal geh cồng nha ală bơta pràn ù tiah, phan geh is ù tiah, phan geh is brê bơnơm, phan geh is dà ai jơnau kờñ bơtàu tơnguh kơl jăp, gơguh lơh sa tơlir gơdờp bal mờ tam gơl trồ tiah, di tŭ git ală bơta niam tàm lơgar mờ dunia, tàm hơ̆ uă ngan là ngui bơta chài măi mok dơ̆ 4 nàng lơh jăt mờ gùng dà tam gơl sồ ai càr Dăk Lăk bơtàu tơnguh kơl jăp, tơrgùm bal mờ brồ guh bơngă pa”.

Tây Nguyên geh ù tiah kwơ màng bè cíñ trị, lơh sa, bơta niam chài, sền gàr dà lơgar-lơngăp lơngai lơh broă bal mờ lơgar ndai gùt lơgar dê. Tàm hơ̆, càr Dăk Lăk geh sền là tiah tờm jơh gùt Tây Nguyên dê. Tàm pơrjum yal kơrnoăt kĭ rơndăp ù tiah càr Dăk Lăk pa do, dùl dơ̆ tai Phó Thủ tướng Trần Hồng Hà đơs nền, càr Dăk Lăk geh ù tiah kwơ màng ngan, geh uă bơta pràn, geh bơta niam chài uă bơta. Rơndăp ù tiah càr Dăk Lăk là dùl broă lơh mùl màl jơh gùng dà broă lơh dờng bơh Ƀộ Cíñ trị dê tàm Nghị quyết sồ 23 bè gùng dà bơtàu tơnguh lơh sa mpồl bơtiàn mờ gàr niam dà lơgar, bơta lơngăp lơngai tiah Tây Nguyên dê tus nam 2030, wèt tus nam 2045. Den tàng Phó Thủ tướng Trần Hồng Hà neh sồr: “Kơnòl sơnrờp ngan bơh kơnòl rơndăp ù tiah là broă geh bal mờ ală càr ndai tàm tiah Tây Nguyên sền wơl rơndăp ù tiah tàm Tây Nguyên dê, bơta do kwơ màng ngan. Tài geh gŏ tàm muh măt bơh càr Dăk Lăk dê tàm bơta pơgồp bal đah ală tiah krơi is. Gŏ geh ù tiah tờm càr Dăk Lăk dê tàm bơta pơgồp bal mờ ală tiah dềt tàm Tây Nguyên dê, mờ ală tiah dờng ndai bè Tiah tàm gùl jăt gah dà lềng, tiah đah jum măt tơngai lik ha là dunia bè lơgar Campuchia mờ ală lơgar tàm tiah đah jum măt tơngai lik câu Á ndai. Bal mờ broă bơtàu tơnguh bơh broă tơrbŏ bal tiah mờ tiah dềt, añ đơs là geh ai gŏ dùl Tây Nguyên geh bơta pràn pơnrơ ngan mhar”.

Gơtùi đơs, broă ai geh, git mờ ngui niam ală bơta geh, bơta pràn bal mờ rơndăp ù tiah tơrgùm bal bơh càr dê, Đảng ƀộ, gơnoar atbồ, làng bol ală jơi bơtiàn càr Dăk Lăk neh pơn jăt tai ngui geh bơta pràn is, lơh ngan tŭ geh bơta pràn bơh bơdìh nàng lơh geh bơta pràn bơh “nam Nggrài 2024” dê, ai lơh sa mpồl bơtiàn càr dê gơguh pràn kơl dang, bơtàu tơnguh mhar mờ kơl jăp tàm tơngai pa.