Tàm nam 2023, Kông ty ồs đèng Dăk Lăk neh klơm niam rơlao 30 kơi sồ gùng che kăp viễn thông tàm ală tiah gơwèt kơnhoàl Krông Păc, Buôn Đôn, Cư̆ Kuiñ, Krông Ana, Ea Súp, Krông Bông, Lăk mờ Cư̆ Mgar. Pơn jăt tai broă lơh niam che kăp viễn thông, tàm hơ̆ uă ngan là tàm ală tiah di gơlan gơtìp ờ niam lơh gơtìp gơtŭp gùng che ồs đèng, Gah ồs đèng càr Dăk Lăk neh lơh mpồl Zalo “Phan bơna bơta chài” mờ rơlao 50 nă cau tàm mpồl, tàm hơ̆ geh kwang đơng lam gah ồs đèng, kwang đơng lam 6 mpồl lơh broă gah viễn thông, cau lơh broă atbồ gùng che, cau lơh broă atbồ gơl gùng che kăp.

Pah ngai, mpồl do geh dờp jơnau yal, rùp geh bal tiah tŭ gơtìp ală bơta ờ niam bè broă yồng che kăp tềng ñjrong đèng, ring bal tơngai lơh mờ broă ai git loh che kăp bơh mpồl lơh broă lơi tơnơ̆ mờ hơ̆ geh tơrgùm wơl, koh, klơm niam. Bŭ lah rơ̆p geh lơh mpồl Zalo “Phan bơna bơta chài” neh dong kờl bơsong broă mhar, pleh mờ bơta koh ờ di che kăp lơh ờ niam tus mờ bơta geh internet. Tàm tơngai tus, gah lơh ồs đèng càr Dăk Lăk pơn jăt tai geh sùm mpồl Zalo mờ rề ơnàng tai nàng geh uă cau gơwèt Sở Thông tin mờ Truyền thông, Phòng Kiñ tế hạ tầng ală kơnhoàl, ƀòn dờng, thị xã, Kông ty atbồ tờm chi, ồs đèng àng gùng ƀòn..., nàng bơsong broă geh ƀuơn, niam rơlao. Bơta do kờñ tơnguh broă pơgồp bal đah ală mpồl lơh broă, gàr niam nùs nhơm di pal tàm ală broă lơh niam tiah drà, bơsong klơm niam che kăp viễn thông, koh niam ntê tòm chi... mờ ờ lơh gơtìp gơrềng tus mờ broă geh ồs đèng, gùng che internet dê.