VOV4.K’ho - Dơ̆ pơrlòng jơh bơsram kấp 3 nam 2022 sơlơ ngai sơlơ mờr tus, kòp kovid-19 gam gơtìp kal ke, ală hìu bơsram kâp 3 tàm càr Dăk Lăk gam bơto mờ bơsram ndrờm bal nàng lơh gơs broă bơto mờ bơsram nam bơsram dê.

Kwơ màng là broă bơtơl bơta ngăc ngar ai kơnòm bơsram lồi kấp in nàng rơcang ai dơ̆ pơrlòng jơh bơsram mờ pơrlòng mŭt bơsram đại họk, cao đẳng tus do in. Gùt càr Dăk Lăk geh 59 hìu bơsram kấp 3, tàm hơ̆ geh 48 hìu bơsram neh ai kơnòm bơsram ơdŭ 12 in tus lòt bơsram. Ală hìu bơsram gam tai gam bơsram jăt broă lơh pờ tơlik tàm internet, mìng là kơnòm bơsram tàm ƀòn dờng Buôn Ma Thuột mờ kơnhoàl Krông Búk. Ồng Phạm Đăng Khoa, Kwang atbồ Sở Giáo dục mờ Đào tạo càr Dăk Lăk pà git, ai bơh tàm bơta kòp gơtờp tàm càr dê, ală hìu bơsram geh bơyai lơh bơto bơsram ndrờm bal, gàr niam tơngai, tơngu me tờm; mờ gàr niam bơta pràn kơl dang să jan ai kwang bàng, cau pơgru, cau lơh broă mờ kơnòm bơsram in.

Cau mblàng Ndong Brawl