VOV4.K’ho - “Càr Dăk Lăk pal lơh pràn rơlao tai broă rơcang pleh mờ rềs àr bŭ dà tàm kơnòm dềt”. Do là jơnau sồr bơh Mpồl kwang bàng lơh broă bơh Ủy ƀan Văn hoá-Giáo dục Quốk hội khoă 15 tŭ lơh broă mờ UɃÑZ càr bè broă lơh jăt broă dong kờl, adăt boh lam rơcang sơndră mờ bŭ dà kơnòm dềt tàm càr mho òr (11/08).

           Ồng Tạ Văn Hạ, Phó Củ ñiệm Ủy ƀan Văn hoá - Xã hội Quốk hộigeh jơnau đơs tàm dơ̆ lơh broă

Jăt jơnau yal bơh UɃÑZ càr Dăk Lăk dê, broă gơtìp bŭ dà tàm kơnòm dềt tàm càr do kung gam gơtìp sùm, khà kơnòm dềt gơtìp chơ̆t nam tơnơ̆ uă rơlao mờ nam lài. Bơh nam 2016 tus tŭ do geh rơlao 420 nă kơnòm dềt gơtìp chơ̆t tài bŭ dà, mìng is 6 nhai bồ nam 2022, neh geh 55 nă gơtìp chơ̆t, tơrgùm uă ngan tàm ală kơnòm dềt bơh 6 tus 13 sơnam. Đơs tàm dơ̆ lơh broă, ồng Tạ Văn Hạ, Phó Củ ñiệm Ủy ƀan Văn hoá - Xã hội Quốk hội neh tam pà bal mờ ală kal ke mờ ờ pràn càr Dăk Lăk gam gơtìp. Mờ sồr ală kấp, ală gah lơh broă tàm càr pal tơnguh uă rơlao tai kơnòl tàm broă lam sồr, bơto bơtê, tơnguh uă jơnau git wă ai gùt làng bol in bè broă sơndră, pleh mờ rềs àr bŭ dà tàm kơnòm dềt.

Cau mblàng Ndong Brawl