Jăt jơnau yal bơh UɃÑZ kơnhoàl Mdrăk, broă lơh tơnao dơng dà Krông Păc thượng neh bơ̆t dà, prăp dà tàm lồi nhai 3 nam 2023 lài do. Mơya, tus tŭ do mìng rơ̆p geh di pơgăp 450 hìu tàm khà 700 hìu tàm tiah tơnao dà bơh rơndăp broă lơh do neh ntrờn tus tàm ƀòn ơm kis pa sồ 01 mờ sồ 02 tàm kơnhoàl Ea Kar.

Tàm khà 250 hìu ờ hềt ntrờn, geh 28 hìu tàm tiah bơtơ̆t 483 thơ̆k bơh tơnao dơng dà dê, geh tìp uă bơta ngòt rơngơ̆t di lah mìu dà tih, di gơlan gơtìp dà tàm tơnao gơguh tih, lơh gơbam là uă ngan. Ală hìu do lơh ngan pal gơtìp rồn bơklơn lài mờ ngai 30 nhai 03 nam 2023, gơwèt dơ̆ sơnrờp, tơngai dơ̆ 2 bơh broă rồn bơklơn toh wơl ù gơwèt mờ ală hìu ờ lơh jăt kơrnoăt toh wơl ù nàng lơh broă. Bal mờ broă lơh ngan rồn bơklơn 28 hìu tàm tiah bơtơ̆t ñhoa 483 thơ̆k, UɃÑZ kơnhoàl Mdrăk geh lơh ngan lam sồr, yal mblàng nàng ntrờn jơh ală hìu gam tai tàm tơnao dà.