VOV4.K’ho - Nàng rơcang ai nam bơsram pa 2022-2023, uă cau mè bèp bal mờ kơnòm bơsram tàm càr Dăk Lăk neh mhar lòt blơi sră măi, tàm hơ̆ uă ngan là sră măi ală mpồl ơdŭ 3, 7, 10. Uă cau mè bèp ờ sŭk ngòt gơtìp ờ tơl sră măi tŭ do do là nam bơsram sơnrờp ngan geh lơh jăt broă bơto phổ thông pa.

Nam do, ồng Đỗ Hùng Thuần, kis tàm sơnah ƀòn Tân An, ƀòn dờng Buôn Ma Thuột ờ tus blơi sră măi ai kòn ồng in mờ sồr cau ndai blơi. Ồng Thuần pà git: nam do ngui jăt broă lơh sră măi pa, sră măi tŭ do geh 3 pang geh ală hìu tăc sră ai, tàm hơ̆ geh pang sră nđar Klềng, Jơng trồ bơceh lơh, tơrbŏ bal bơta ngăc ngar mờ hìu bơsram anih kòn he bơsram nàng blơi ală pang sră bơh uă pang krơi is. Bơta do lơh kal ke tus mờ ồng tŭ jòi nàng blơi: “Jăt mờ tơl hìu bơsram krơi is mờ geh ală pang sră krơi is sơl, pal sồr ală cau lơh broă tàm hìu tăc rơwah, di lah ờ mè bèp ờ gơtùi, ờ git rơwah bè lơi nàng geh tơl pang sră kòn in bơsram”.

                                       Cau mè bèp kơnòm bơsram rơwah sră măi oh kòn in

Gam gơwèt mờ ală kơnòm bơsram bè oh Phan Ngọc Hân, bơsram ơdŭ 7A4, hìu bơsram kấp 2 Nguyễn Tất Thành, kơnhoàl Cư̆ Mgar bŭ lah neh geh hìu bơsram bal khà măt ală pang sră pal blơi, mơya nàng blơi geh tơl sră măi, oh pal jà mờ mè bèp pơn diang tus tàm hìu tăc sră hờ ƀòn dờng Buôn Ma Thuột. “Oh tus bơh kơnhoàl Cư̆ Mgar, tŭ tus tàm do oh ờ git bè lơi tŭ pal rơwah uă pang sră măi bè jơng trồ bơceh lơh, tơrbŏ bal bơta ngăc ngar, nđar klềng. Mơya kơnờm mờ broă dong kờl bơh hìu bơsram, oh neh rơwah geh pang sră di pal”.

Jăt mờ kơrnoăt sồ 1360 ngai 16 nhai 06 nam 2022 bơh UɃÑZ càr Dăk Lăk ai bè broă kĭ khà măt sră măi bơto ơdŭ 3, ơdŭ 7 mờ ơdŭ 10 ngui tàm hìu bơsram phổ thông bơh nam bơsram 2022-2023 tàm càr do, gơwèt mờ mpồl ơrŭ 3 là 21 măt sră; ơdŭ 7 geh 26 măt sră; mìng is ơdŭ 10 tus 44 măt sră bơh 3 pang sră Klềng par, jơng trồ bơceh lơh mờ Tơrbŏ bal bơta ngăc ngar mờ kờp jơh geh 138 pang sră, geh bal sră măi rơwah is mờ sră măi pal blơi.

Ồng Trương Văn Băng, Kwang atbồ Kông ty Kổ phần Sră-Phan hìu bơsram càr Dăk Lăk pà git: Nàng gàr niam broă geh tơl pang sră măi ai nam bơsram pa in, tàm hơ̆ uă ngan là gơwèt mờ ală mpồl ơrŭ geh ngui broă bơto phổ thông nam 2018, Kông ty Kổ phần Sră-phan hìu bơsram càr Dăk Lăk neh ai jơh bơta pràn; ai tai anih, jrang ơn, bơyai bơto cau lơh broă nàng pơlam bè broă dong kờl cau mè bèp, kơnòm bơsram bal mờ ală hìu tăc rơwah, blơi sră măi di pal. “Ală hìu bơsram, ală kơnhoàl, ƀòn dờng, thị xã, ală hìu bơsram rơwah sră măi là krơi is mờ ờ ndrờm bal, den tàng kông ty neh hơ mờ Hìu lĭp sră bơto bơtê Việt Nam là kông ty geh ai tơl sră măi, sră jơnau bơsram tàp ai ală kơnòm bơsram tàm càr Dăk Lăk in, ờ lời ờ tơl sră măi tàm ờ uă tiah, bŭ lah tàm tiah lơi tàm nam bơsram 2022-2023”.

Broă rơcang lài sră măi ai nam bơsram pa in sùm là broă sền gròi ngan bơh ală cau mè bèp bal mờ kơnòm bơsram dê. Den tàng, nàng dong kờl broă blơi sră măi ai ală kơnòm bơsram in di mờ pang sră neh geh ai, Sở Giáo dục mờ Đào tạo càr Dăk Lăk neh geh jơnau sồr ală hìu bơsram pal yal di tŭ khà măt ală sră măi ngui tàm nam bơsram pa. Mờ bơto pơlam ală cau mè bè, kơnòm bơsram in git bè broă “gơguh” sră măi sùm gơtìp tàm bồ nhai ha là nggùl nhai 8 do, nàng bañ jal ir jòi blơi sră tàm tơngai do. Bal mờ hơ̆, pal jòi blơi sră măi tàm ală hìu tăc sră geh pin dờn, pleh mờ bơta blơi ờ di sră măi ờ ngan, ờ niam mờ blơi ờ di măt sră.

Sở Giáo dục mờ Đào tạo càr Dăk Lăk kung neh tơlik jơnau bơto sồr bơyai rơwah sră măi ală ơdŭ 3, 7, 10 ai nam bơsram 2022-2023 in jăt mờ broă tam gơl pa broă lơh sră măi bơto phổ thông geh Ƀộ Giáo dục mờ Đào tạo ai lơh. Jăt mờ hơ̆, Sở Giáo dục mờ Đào tạo càr Dăk Lăk sồr ală mpồl lơh broă, hìu bơsram tàm càr dờp kơnòl lơh broă rơndăp lơh nàng lơh jăt broă rơwah sră măi di jăt mờ jơnau bơto sồr bơh Ƀộ Giáo dục mờ Đào tạo bal mờ UɃÑZ càr; Sở kung lơh jăt, yal tơl ală sră nggal bơto sồr, đơng lam bè broă tam gơl pa broă bơto phổ thông mờ rơwah sră măi ai jơh kwang bàng, cau pơgru, cau lơh broă, kơnòm bơsram mờ cau mè bèp in.

Lài mờ hơ̆, nàng ai tơl bơta niam mpồl kwang bàng atbồ, cau pơgru bal mờ mè bèp kơnòm bơsram in geh tơngai nàng jòi sền, kơlôi sơnơng mờ git di pal tơngu me ală pang sră măi geh ală hìu lĭp sră ai, Sở Giáo dục mờ Đào tạo càr Dăk Lăk neh pơgồp bal lơh jăt 2 dơ̆ yal sră măi ală ơdŭ 3, 7 mờ 10 jăt broă lơh pờ tơlik tàm internet đah Sở Giáo dục mờ Đào tạo, ală hìu lĭp sră bal mờ ală mpồl hìu bơsram tàm càr Dăk Lăk.

Cau mblàng Ndong Brawl