Jơnau yal tàm pơrjum, tơngai lơh broă do, Tỉñ ủy càr Dăk Lăk neh ai tơlik 6 kơnòl broă, 3 broă lơh bơtàu tơnguh mhar tàm bơtàu tơnguh lơh sa- mồl bơtiàn. Bơh 2 nam nggùl lam lơh tus tŭ do, ală kơnòl broă sền bal là neh lơh geh jơnau sồr geh ai. Gơguh lơh sa geh khà gơguh, kờp bal gơguh 7,07% dùl nam (broă rơndăp lơh tơngai bơh nam 2020-2025 kờp bal gơguh 7,01% dùl nam); priă lơh geh kờp jơh phan bơna lơh geh 56% broă rơndăp lơh; rài lơh sa dờng nam 2023 uă rlau 1,2 dơ̆ pơndrờm bal dùl tŭ mờ nam 2020.

Bơdìh ală cồng nha neh lơh geh, tàm pơrjum, ală kwang bàng neh song dơ pă  sơñio ală bơta ờ hềt di pal, ờ hềt pràn tàm broă lơh jat Nghị quyết Đảng ƀộ càr Dăk Lăk dê nggùl tơngai lơh broă do bè broă lơh đơng lam, sồr lơh bơh bàr pe kấp ủy đảng, gơnoar atbồ gam ờ hềt kràñ cê jơh nùs, ờ hềt di tŭ. Broă lơh bơh ală anih lơh broă cíñ trị geh tŭ ờ tơl bơta dùl ròt bal, broă lơh pơgồp bal gĭt loh ù tiah ờ hềt niam, bơta lơngăp lơngai cíñ trị rơndăp tăp sèng, lơngăp lơngai mpồl bơtiàn gam geh uă jơnau lơh roh bơta kơ̆ kơljăp, broă lơh atbồ, sền gàr brê tàm bàr pe tiah lơh jat ờ hềt niam...