Gam rơwah nàng blơi ƀañ tềng hìu tăc ƀañ trung thu tềng gùng Lê Thánh Tông, ƀòn dờng Buôn Ma Thuột, lŏ Phùng Thị Thúy Hạnh, kis tàm sơnah ƀòn Tân An, ƀòn dờng Buôn Ma Thuột yal, ală kòn lŏ dê kờñ ngan sa ƀañ trung thu. Nam do, ƀañ geh uă bơta bè khà măt kă bro bal mờ bơta niam lơh geh, mơya hìu nhă lŏ kung gam kờñ ală bơta ƀañ bè ờs, geh khà măt tàm drà kă bro. Lŏ Phùng Thị Thúy Hạnh pà git: “Tŭ añ rơwah blơi ƀañ trung thu den añ geh rơwah ală bơta phan geh pin dờn, jŏ jòng tàm drà kă bro nàng geh bơta kloh mờ ƀañ kung geh lơh niam mờ bơkah tai”.

Neh geh tăc ƀañ trung thu rơlao 30 nam do, lŏ Nguyễn Thị Tuyết Mai, kis tàm sơnah ƀòn Tân Lợi, ƀòn dờng Buôn Ma Thuột pà git, ƀañ trung thu mờng geh tơngai ngui ờ jŏ, den tàng lŏ ờ blơi phan dùl dơ̆ mờ geh tam pà gơs uă dơ̆. Bơta do geh pleh mờ bơta di gơlan gơlời ƀañ ờ geh cau blơi mờ gàr geh bơta kloh niam ƀañ dê. Lŏ Nguyễn Thị Tuyết Mai pà git: “Añ blơi phan là añ ờ blơi dùl dơ̆ lĕ, mờ añ blơi tơl dơ̆ tơl dơ̆ dùl den tàng ƀañ añ dê tŭ lơi kung gam pa nàng cau năc in iang nùs tàm broă sa. Bơta do là ai geh lài ngan”.

Tàm siêu thị Go Buôn Ma Thuột, hìu tăc ƀañ Trung thu geh siêu thị rơndăp bal mờ tiah tăc plai chi nàng ƀañ geh gàr bơta mrềt niam ai ƀañ in. Ồng Bùi Văn Quân, Kwang atbồ Siêu thị Go Ƀuôn Ma Thuột pà git: “Bol añ sền gròi bơta kloh niam bơh tàm broă blơi phan tơmŭt tàm do nàng tăc, gàr geh bơta mrềt niam. Tŭ do ƀañ geh gàr tàm bơta mrềt bơh 25 tus 27 độ mờ bol añ ai ƀañ trung thu geh di mơ bơta phan sền gàr”.

Gàr niam bơta pràn kơl dang să jan ai cau ngui sa in, broă sền gròi kloh niam phan sa lài mờ satềp trung thu, tàm satềp trung thu mờ tơnơ̆ mờ satềp trung thu geh càr Dăk Lăk sền kwơ ngan. Jăt mờ hơ̆, Anih duh broă Làng bol càr neh lơh geh 02 mpồl lòt sền tus bơh ală gah lơh broă bè kloh niam phan sa di tàm Satềp Trung thu nam 2024 tàm ƀòn dờng Buôn Ma Thuột, ƀòn drà dờng Buôn Hồ mờ ală kơnhoàl Krông Păc, Ea Kar, Cư̆ Kuiñ mờ Lăk. Bal mờ hơ̆ Đah Atbồ drà kă bro càr Dăk Lăk mờ ală kơnhoàl, ƀòn drà dờng, ƀòn dờng kung lơh geh ală mpồl lòt sền nàng di tŭ kơrian, lơh glài ală broă lơh tìs tàm gah lơh, kă bro ală bơta phan drơng satềp Trung thu nam do in.

Tàm broă lòt sền, ală mpồl lơh broă neh tơrgùm sền bè phan lơh, broă ngui phan tĕ phan sa, phan dong kờl lơh gơs phan sa, bơta tơl kloh niam phan sa tàm broă lơh, lơh gơs, prăp gàr phan sa; sền git bè anih lơh, bơta kloh niam phan sa, tơngai ngui bơh phan kă bro; sră tăc, lir khà priă… Ồng Vương Minh Sơn, Phó Kwang atbồ Đah atbồ drà kă bro càr Dăk Lăk pà git, ală mpồl lòt sền kung neh pơgồp bal mblàng yal tus ală hìu lơh, hìu kă bro bè ală jơnau pal jăt tàm adăt boh lam dê bè kă bro phan mờ gàr kloh niam phan sa, broă lơh jăt jơnau geh ai bè yal jơnau geh ai, yal jơnau di mờ jơnau geh ai bơh phan kă bro mờ jơnau pal jăt bè bơta bơkah phan kă bro.

Ồng Vương Minh Sơn pà git: “Bol añ sồr ală mpồl lơh broă tờm tơrgùm tàm pang sră geh cih ai tơngŏ anih tờm lơh gơs. Dơ̆ bàr là khà măt kă bro phan, tàm hơ̆ pal cih tơl ală bơta neh geh cih tềng pang sră, bơta tờm ngan là jơnau cih bơta bơkah, tơngai ngui, tơngai lơh, tơngai prăp gàr. Di lah gŏ rơp lơh glài di mờ jơnau geh ai tàm adăt boh lam dê”.

Bơh tàm mùl màl lòt sền, tus tŭ do Mpồl Atbồ drà kă bro sồ 01 neh gŏ bàr hìu kă bro tàm ƀòn dờng Buôn ma Thuột tìs bè kă bro phan bơna ờ cih loh anih lơh gơs, tàm hơ̆ geh: 42 bơta phan ƀañ trung thu (bơta 500 gram tàm 01 nơm), 50 kĭ plai táo pơrhê pơr ro, rơlao 2 rơbô 300 bơta phan nhơl kơnòm dềt ală bơta geh tơngŏ nùs nhơm tam lơh (phào, pềs, tà, sơna kam), mờ kờp jơh priă gơtìp lơh glài rơlao 33 tơlăk đong. Jơh ală bơta phan do ndrờm blơi bơh lơgar bơdìh ờ di mờ gùng dà geh ai, ờ geh sră nggal ai tơngŏ di mờ adăt boh lam dê. Mpồl neh bơyai lơh glài tìs mờ priă gơwèt mờ bàr hìu kă bro do mờ sồr pal chu pơrgŭc jơh ală phan gơtìp tìs do.