VOV4.Kho - Tơngai pa do, tàm gùt lơgar neh gơtìp uă dơ̆ ồs sa lơh hoàc huơr uă ngan bè kòn bơnus bal mờ phan bơna. Tàm uă bơta gơtìp ồs sa là tài gơtìp gơtŭp che đèng.

                     Cau lơh broă gah ồs đèng pà sră lam sồr niam ờ do ờ dă ồs đèng ai làng bol in

                  Pal sền gròi sùm ală phan ngui ồs đèng nàng rơcang sơndră mờ ồs sa bơrtoh

Rơcang sơndră mờ ală bơta gơtìp do, ală mpồl lơh broă gah ồs đèng càr Dăk Lăk gam chồl pràn broă lam sồr, bơto sồr làng bol ală broă ngui ồs đèng niam ờ do ờ dă, tềm pềr mờ rơcang sơndră mờ ală bơta rềs àr tài tìs mờ broă lơh niam ờ do ờ dă gùng che ồs đèng kao áp. Geh pơnrơ ngan bè tàm Cư̆ Kuiñ, bal mờ broă lam sồr tàm anih pờ tơlik jơnau đơs ală xã bàr dơ̆ tàm 1 nhai, gah lơh ồs đèng neh pà sră yal bè broă ngui ồs đèng niam ờ do ờ dă, pơgồp bal mờ broă lam sồr tơn tàm ală anih tă priă ngui ồs đèng, tàm hìu cau pa crăp kông tơ; pơgồp bal mờ ală Bưu điện chài rơgơi xã pà sră tàm ngai jào priă nhai cau neh jơh sơnơm lơh broă pah nhai...

Jăt mờ hơ̆, làng bol geh bơto sồr git đal bơta ngòt rơngơ̆t mờ ồs đèng tàm rài kis pah ngai mờ ală broă rơcang sơndră mờ rềs àr bè: sùm sền gròi gùng che ồs đèng, ală phan ngui ồs đèng, phan crăp ồs đèng tàm hìu; koh gùng che ồs đèng tŭ ờ geh ngui; tê sùh ờ geh tŭp tềng phan gam ngui ồs đèng; ờ ngui ồs đèng nàng sơndră mờ broă roh phan, pơ̆t dă đe, sồc ka; ờ ìs phan, yồng phan tàm ală phan ngui geh gùng che ồs đèng... Làng bol kung geh lam sồr gàr niam jăt gah gùng che ồs đèng niam bè: ờ hào ñjrong đèng ha là tàm tiah geh sền gàr niam ờ do ờ dă broă lơh ồs đèng; ờ tơnpar klềng rềp mờ gùng che ồs đèng; ờ crăp ală phan ngui ha là tam chi tìs rềp mờ gùng che ồs đèng...

Cau mblàng Ndong Brawl