VOV4.K’ho - Ngai òr (07/06), Tỉñ ủy Dăk Lăk pơgồp bal mờ Học viện Cíñ trị Dà lơgar Hồ Chí Minh bơyai lơh pơrjum cri bơyai khoa học mờ tơngu me “Càr Dăk Lăk tơrgùm tơnguh bơtàu lơh sa suơn sre jăt broă lơh geh bơta niam uă, kơl jăp”.

              Càr Dăk Lăk tơrgùm tơnguh bơtàu lơh sa suơn sre jăt broă lơh geh bơta niam uă, kơl jăp

Tàm pơrjum cri bơyai, ală kwang bàng neh cri bơyai bè bơta mùl màl, bơta pràn, bơta niam, bơta tơlòng, gùng dà mờ broă lơh nàng tơnguh bơtàu lơh sa suơn sre càr Dăk Lăk jăt gùng dà geh bơta niam uă, kơl jăp là dùl tàm 6 kơnòl tờm nàng tơnguh bơtàu lơh sa càr dê, geh cih tàm Nghị quyết Pơrjum dờng Đảng ƀộ dơ̆ 17, tơngai lơh broă bơh nam 2020 tus 2025. Tàm pơrjum, ală kwang bàng neh dan geh ală broă lơh nàng tơnguh bơtàu lơh sa suơn sre kông nghệ kao bè ngui bơta gơguh jăk khoa họk kỹ thuật, hòi jà bơcri priă, ngui ală cồng nha bơh gah lơh sa mờ măi mŏk 4.0 tàm gah lơh sa suơn sre. Bơh tŭ hơ̆, ai geh broă ring bal, lơh pràn, lơh geh cồng nha ai càr Dăk Lăk in nàng tơnguh bơtàu lơh sa suơn sre geh bơta niam uă, kơl jăp, lơh jăt jơnau kờñ tơnguh bơtàu “lơh sa suơn sre sinh thái, ƀòn lơgar pa, làng bol lơh broă sa gơguh jăk”.

Cau mblàng Ndong Brawl