Ngan là tàm gùng Hồ Chí Minh gơl lòt gan sơnơnah ƀòn Quảng Thành, ƀòn dờng Gia Nghĩa, tiah đah thòng jrô neh gơ hùc ù rlau 3 thơk. Tềl tơrlah pơn jat tai gơrề jòng, gơ rề ơnàng, pơhìn gơrềng tus pơgap 100 hìu bơnhă làng bol dê. Tàm tiah nhàr lơgar xã Quảng Trực, kơnhoàl Tuy Đức, tềl rơđàng koh gơl, gơ hùc ù kung gam gơ rề uă, mờ gơlik geh tai dùl tiah tềl rơđàng, ơnàng pơgap 80 phơng. Gơnoar atbồ tiah do neh ntrờn 66 hìu bơnhă làng bol tàm ală ƀòn Bu Krắk, Bu Prăng, căng kơryan ờ ai làng bol in mut tàm tiah ngòt rơngơ̆t. Kơn jơ̆ ngan rlau jơh là tàm tơnau dơng dà Dăk N’ting, xã Quảng Sơn, kơnhoàl  Dăk Glong, bơtơ̆t rbòng dà neh gơlik geh tai uă tềl rơđàng koh gơl ƀê tông tiah đah hơđang mờ tiah đah hơ đơm bơtơ̆t rbòng dà lìu, pơhìn tơrlah tơnau dơng dà Dăk N’ting.

Tơnơ̆ tŭ lòt sền bơta geh ngan tàm ală tiah gơ hùc ù, tơrlah gơ cò ù, tàm dơ̆ pơrjum ngai 5/08, Củ tịc Ủy ƀan Ñân zân càr Dăk Nông sồr ală sở, ngàñ, ală tiah tơrgùm kờp sền, di tŭ ntrờn làng bol lik bơh tiah geh bơhìn roh bơta lơngăp lơngai. Gah gùng lòt càr Dăk Nông mờ gơnoar atbồ ƀòn dờng Gia Nghĩa neh lơh pơng gàr kơryan, sơntơ̆p kƀàng tơngkah lài tiah ngòt rơngơ̆t tơrlah ù, kƀàng yal tơngĭt lài ờ hoan ai ală rơndeh rơndồ lòt rê gan gơl gùng pleh Gia Nghĩa (gùng tàm tơrbŏ bal Gùng dờng 14 mờ Gùng dờng 28).