VOV4.K’ho - Tài bè lơi sùm 3 nam pa do, càr Dăk Nông sùm ơm dŭt ndơl tàm khà săp sèng điểm pơrlòng jơh bơsram kấp 3 dà lơgar dê. Do là broă geh uă ngan jơnau đơs tàm pơrjum dơ̆ 4, HĐÑZ càr Dăk Nông khoă 4 dê geh bơyai lơh tàm 2 ngai do.

                 HĐÑZ càr Dăk Nông lùp mờ hơ jơnau lùp bè bơta niam broă bơto bơtê mờ bơsram

Pơrlòng jơh bơsram kấp 3 nam 2022, càr Dăk Nông geh tơl khà jơh bơsram geh 96,7%; điểm kờp bal tơl môn geh 5,9 điểm, săp sèng ơm dơ̆ 61 tàm 63 càr, ƀòn dờng tàm gùt lơgar. Do là nam dơ̆ 3 pơn jăt tơn càr Dăk Nông ơm tàm mpồl dŭt ndơl bơh broă săp sèng cồng nha bơh dơ̆ pơrlòng jơh bơsram kấp 3 dê. Yal mblàng lơh loh tềng đăp HĐÑZ càr Dăk Nông, ồng Nguyễn Văn Toàn, Kwang atbồ Sở Giáo dục mờ Đào tạo càr Dăk Nông mblàng lơh loh, bơta tờm là tài khà kơnòm bơsram jăk tàm càr ờ uă, den tàng điểm geh kờp bal ală môn pơrlòng ờ uă. Rơlao mờ hơ̆ tai là geh uă kơnòm pơrlòng neh ngui họk ƀạ nàng rơwah mŭt bơsram đại họk, broă tus pơrlòng mìng kờñ ai điểm jơh bơsram. Mờ ù tiah gam uă kal ke bè càr Dăk Nông, ồng Nguyễn Văn Toàn đơs là, kal ke ngan kờñ geh tam gơl khà săp sèng bơh dơ̆ pơrlòng jơh bơsram kấp 3 càr dê.

Cau mblàng Ndong Brawl