Ồng Lê Trọng Yên, Phó Củ tịc Ủy ƀan Ñân zân càr Dăk Nông pà gĭt, càr neh gĭt jơnau yal bè bơta tơrlah tàm dà dờng Krông Nô gơl hiòng dà hòr gan xã Quảng Phú, kơnhoàl Krông Nô. Bơh hơ̆, Ủy ƀan Ñân zân càr neh đơng lam ală Sở, ngàñ geh gơ rềng mờ gơnoar atbồ kơnhoàl Krông Nô lơh mpồl lòt sền, lơh loh bơta tơrlah dà dờng mờ yal jơnau.

Ồng Lê Trọng Yên đơs nền, dilah lời gơlik geh tơrlah tàm ală tiah neh ai gơnoar ai mpồl lơh sa kă bro in, den càr rơ̆p sồr pal ai ơm lơh broă tơn hào bràs. Bơdìh hơ̆, càr Dăk Nông kung gam đơng lam lơh loh broă mpồl lơh sa kă bro tơnhào bràs blơi ù lơh sa bơh làng bol tàm tiah tơrlah dê. Ù lơh sa tàm kềng gah dà dờng uă ngan là bràs, dilah mpồl lơh sa kă bro blơi ù nàng ƀuơn ai broă tơn hào bràs tìs mờ adat boh lam, den càr rơ̆p sồr ală gah mut lơh broă mờ lơh glài kràñ.