VOV4.K’ho - Drim òr (27/05), UɃÑZ càr Dăk Nông bơyai lơh Pơrjum lơh niam wơl tiah bơcri priă kă bro, mờ broă tus bal bơh mpồl bơtiàn mpồl lơh sa kă bro, kwang đơng lam ală sở, gah lơh broă tàm càr, ala măt phòng kă bro mờ lơh sa mờ măi mŏk Việt Nam (VCCI) mờ ala măt ờ uă càr gơwèt mpồl lam lài gùt lơgar bè bơta pràn tàm pơrlòng kâp càr.

Nam 2021, PCI càr Dăk Nông rơndăp săp sèng dơ̆ 52 tàm 63 càr, ƀòn dờng tàm gùt lơgar, gơguh 8 dơ̆ pơn drờm mờ nam 2020, sơrlèt 7 dơ̆ pơn drờm mờ jơnau kờñ tàm rơndăp broă neh geh ai. Do kung là khà rơndăp săp sèng dờng ngan càr dê neh geh tàm 5 nam pa do. Bơh bồ nam do, càr Dăk Nông neh sền wơl ală kal ke gơtìp tàm broă bơcri priă kă bro càr dê, iăt git nđờ jơ̆t jơnau đơs pơgồp bal bơh ală mpồl lơh sa kă bro tàm gah do dê. Củ tịc UɃÑZ càr Dăk Nông ồng Hồ Văn Mười đơs, geh lơh ngan tơnguh uă sơnđio khà PCI nam 2022 mờ ală nam pơn jăt tai gàr geh cồng nha rơlao; lơh tiah bơcri priă, kă bro mùl màl niam, ndrờm bal, ai geh nùs nhơm pin dờn mpồl lơh sa kă bro in lơh broă niam mờ tơnguh bơtàu.

Cau mblàng Ndong Brawl