Ồng Lê Quang Dần, Phó Kwang atbồ Sở Nông nghiệp mờ Phát triển Nông thôn càr Dăk Nông, pà gĭt, kờp tus tŭ do, dơ̆ mìu dờng jŏ jòng tàm ù tiah càr dê neh lơh 1 nă cau chơ̆t, 159 nơm hìu gơtìp ngơr bam dà, mờr 360 lồ phan tam ală bơta gơtìp ngơr jrô tàm dà mờ pơgap 150 lồ tơnau dà ròng ka bơh làng bol dê gơtìp dà lìu àr. Mìu dờng kung neh lơh hoàc huơr uă broă lơh bơt bơtàu tàm ù tiah càr dê, ngan là bè gùng lòt rê, bơtơ̆t rbòng dà.

Tus tŭ do, tàm ù tiah càr Dăk Nông geh 79 hìu bơnhă pal ntrờn tus tiah ơm kis lơngap lơngai tài bơh tiah ơm kis gơtìp ngơr jrô tàm dà mờ tơrlah ù. Pal đơs ngan là bơta gơ hùc ù tàm xã tiah nhàr lơgar Quảng Trực, kơnhoàl Tuy Đức dê gam gơlik geh kal ke. Tàm do, gơnoar atbồ mờ mpồl lơh broă geh gơnoar kơnhoàl Tuy Đức  neh ntrờn 56 hìu bơnhă làng bol bơh 2 ƀòn Bu Krăk mờ Bu Prăng tus ơm ing tàm dùl hìu bơsram. Càr Dăk Nông neh đơng lam ală anih lơh broă geh gơnoar mut lơh broă bal   jòi gĭt jơnau tờm gơbàn nàng geh broă lơh bơsong.