Ngai òr (07/08), Mpồl kwang bàng lơh broă bơh Mpồl đơng lam dà lơgar bè rơcang sơndră mờ rềs àr bơh trồ tiah geh Thứ trưởng Ƀộ Nông nghiệp mờ Phát triển Nông thôn ồng Nguyễn Hoàng Hiệp, Phó kwang atbồ Mpồl neh lam bồ lòt sền bơta mìu dờng, dà tih dà cò, tơrlah ù tàm càr Dăk Nông. Mpồl kwang bàng do sồr càr Dăk Nông pal gờñ yal bơta jal mhar bè rềs àr bơh trồ tiah nàng gơtùi bơsong geh ờ uă kơnòl, broă lơh jal mhar.

Mìu dờng dà tih dà cò ală ngai do tàm càr Dăk Nông neh lơh 2 nă cau gơtìp chơ̆t, mờr 200 nơm hìu mờ rơlao 650 lồ phan tam gơtìp gơbam dà, uă broă lơh phan bơna bè gùng lòt, bơtơ̆t rơbòng dà gơtìp tơrlah uă, kờp dŭ hoàc huơr là rơlao 250 tơmàn đong. Bơh broă tus sền tàm mùl màl bơh mìu dờng dà tih dà cò kung bè tus sền tàm ờ uă tiah gơtìp tơrlah bal mờ broă lơh bơtơ̆t rơbòng dà gơtìp tơrluh, gơmù ù tàm càr Dăk Nông, mpồl lơh broă neh geh jơnau đơs bè bơta rềs àr tàm càr Dăk Nông gam gơtìp kal ke uă. Càr pal gờñ yal jơnau jal mhar bè rềs àr bơh trồ tiah nàng geh ală broă lơh di pal tàm bơta jal mhar gơwèt mờ ală broă lơh neh gơtìp tơrlah tài bơh trồ tiah lơh bè bơtơ̆t rơbòng dà, gùng lòt. Pal kơlôi sơnơng mơ tus mờ broă lơh di lah gơtìp tơrlah bơtơ̆t, nàng geh yal di tŭ.