Do là dùl tơngu me geh ai tơlik tàm jơnau lùp mờ hơ jơnau lùp tàm dơ̆ pơrjum Mpồl duh broă Làng bol càr Gia Lai drim òr (01/10) dê. Jăt jơnau yal bơh Anih duh broă Làng bol càr Gia Lai dê, tus tŭ do ai priă bơcri dà lơgar càr dê mìng rơ̆p pa geh 31,2%, ờ uă rơlao mờ khà bè ờs bơh gùt lơgar dê. Uă kơnhoàl, ƀòn drà dờng, ƀòn dờng, bal mờ ală sở, gah lơh broă geh khà tă priă bơcri bơh dà lơgar lơyài ngan.

Tàm hơ̆, Sở Broă lơh sa mờ Bơtàu tơnguh Ƀòn lơgar, Sở Lơh sơnơm, Sở Niam chài Tàp pràn să jan mờ Lòt nhơl, khà tă priă ờ hềt tus 10%. Ală bơta gơlik geh lơh broă tă priă lơyài mìng là tài gơkòl tơm bơtơl, ntrờn ù tiah, ờ tơl phan lơh broă; uă rơndăp broă gam tàm tơngai rơcang bơcri priă ha là pal geh lơh wơl.