VOV4.K’ho - UɃÑZ càr Gia Lai pa bơyai lơh pơrjum sền wơl broă lơh 9 nhai, lơh jăt kơnòl 3 nhai lồi nam. Củ tịc UɃÑZ càr Gia Lai sồr ală kwang bàng tàm UɃÑZ càr Gia Lai, ală sở, gah lơh broă, mpồl lơh broă, ală kơnhoàl, thị xã, ƀòn dờng tam klăc bal, lơh ngan jăt jơnau đơng lam, pơgồp bal, dong kờl bal tàm broă lơh jăt ndrờm bal ală kơnòl, broă lơh nàng lơh gơs ală jơnau kờñ, khà broă, kơnòl tơnguh bơtàu lơh sa mpồl bơtiàn, sền gàr niam bơta lơngăp lơngai dà lơgar nam 2022.

Đơs tàm pơrjum, ồng Nguyễn Hữu Quế, Kwang atbồ Sở Kế hoạc mờ Đầu tư càr Gia Lai pà git: Gia Lai là dùl tàm ală càr gam geh khà ai priă bơ̆t bơtàu tờm ờ uă ngan. Tàm hơ̆, Mpồl atbồ rơndăp broă lơh bơcri priă bơ̆t bơtàu càr mờ ală sở, gah lơh broă là ală mpồl drơng lơh ală rơndăp broă lơh tờm, geh priă uă, geh khà priă ai ờ uă ngan.

                        Ồng Trương Hải Long, Củ tịc UɃÑZ càr Gia Lai geh jơnau đơs tàm pơrjum

Bè rơndăp broă lơh gùng jăt gah lơh sa hờ đah măt tơngai lik (khà priă bơcri 1 rơbô 200 tơmàn) tŭ do mìng rơ̆p lơh gơs sră nggal, rơcang jòi cau lơh, rơndăp broă lơh gơl gùng Phù Đổng tàm ƀòn dờng Pleiku pal sền wơl sră nggal. Bơdìh hơ̆ tai, broă ală tiah lơyài tàm broă pơgồp bal jào ù tiah lơh kung lơh ờ niam tus mờ broă lơh jăt ală rơndăp broă. Ồng Nguyễn Hữu Quế, Kwang atbồ Sở Kế hoạc mờ Đầu tư càr Gia Lai yal bè rơndăp broă lơh gùng Nguyễn Chí Thanh tàm ƀòn dờng Pleiku mờ gùng lòt tus tàm ală kơnhoàl Chư Sê-Chư Pưh-Chư Prông gơl lòt gan kơnhoàl Chư Pưh: “Gùng Nguyễn Chí Thanh, ƀòn dờng Pleiku ờ hềt geh jào thơ̆k lơi nàng mpồl atbồ rơndăp broă lơh in lam lơh. Mpồl atbồ tŭ do gam lơh tàm ală gơl gùng ờ gơtìp kal ke. Ha là kơnhoàl Chư Pưh, añ là cau lam bồ mpồl kwang bàng tus sền, lam sồr kơnhoàl tơm ntrờn 1 kơi sồ 300 thơ̆k ù tàm thị trấn Nhơn Hoà. Củ tịc UɃÑZ kơnhoàl Chư Pưh mìng rơ̆p kĭ tơm ntrờn ai 50 hìu in, gam 34 hìu jào mpồl atbồ lơh gùng 14 in kung gam ờ hềt geh jào”.

Jăt ồng Nguyễn Hữu Quế yal, geh bơta ai priă lơyài mìng là tài broă rơcang rơndăp broă lơh lơyài ir, kal ke tàm ală broă lơh sră nggal adăt boh lam mờ broă tơm ntrờn ù tiah. Mơya, mờ broă geh uă rơndăp broă sơn đờm lơh jăt tàm quý 4 den khà ai priă geh mhar. Tàm tơngai tus, ală cau tờm bơcri priă pal pơn jăt tai lam sồr ală cau lơh gùng kung bè lơh jăt nền nòn ală kơrnoăt tàm adăt boh lam bè bơcri priă bơ̆t bơtàu tờm nàng lơh gơs broă ai priă geh ai.

                                Uă broă rơndăp lơh tàm càr Gia Lai gơtìp lơyài bơcri priă lơh

Tơngai do, Sở Kế hoạc mờ Đầu tư neh dan mờ UɃÑZ càr Gia Lai tơlik geh uă sră nggal đơng lam ai ală cau tờm bơcri priă in chồl pràn broă ai priă mờ lơh geh 4 mpồl kwang bàng lơh broă tơrgùm tàm broă sền, lam sồr, bơsong kal ke, gơkòl nàng chồl mhar broă ai priă bơcri dà lơgar dê nam 2022. Tus tŭ do, khà ai priă bơ̆t bơtàu tờm càr dê geh 31%, mờr ndrờm mờ khà kờp bal gùt lơgar dê.

Bè tă dia, tŭ do kờp jơh khà tă dia càr dê là 4 rơbô 100 tơmàn đong, gơmù 30,7% pơn drờm mờ tŭ do nam lài. Ồng Nguyễn Anh Dũng, Kwang atbồ Sở Tài cíñ càr Gia Lai pà git, geh bơta do là càr gam gơtìp kal ke tàm broă tă priă ngui ù gơwèt mờ uă rơndăp broă. Ồng Nguyễn Anh Dũng dan geh ală broă lơh nàng tơnguh broă tă kes priă ală nhai lồi nam: “Bol añ dan mờ UɃÑZ càr tơrgùm đơng lam ală sở, gah, mpồl lơh broă tơrgùm sền wơl ală rơndăp broă bơcri priă geh ngui ù, nàng lơh gơs ală sră nggal nàng geh hòi jà bơcri priă mờ lơh geh bơta bơta geh, mờ geh gàr nbiam priă tă. Tơngu me dơ̆ bàr, bol añ pơgồp bal mờ đah tă dia sền wơl ală khà tă tàm 3 nhai lồi nam nàng lơh mờ geh broă jào tă dia nam 2022”.

Bơdìh mờ ală broă bè bơcri priă dà lơgar mờ tă dia, pơrjum bơh UɃÑZ càr Gia Lai kung đơs uă broă pal geh bơsong ndai bè: lơh niam tiah bơcri priă, kòp gơtờp tàm phan tam mờ phan ròng, broă tơnguh bơtàu wơl broă lơh sa, tăc phan geh bơh bơh broă lơh sa suơn sre mờ lơgar ndai, đơs tàm dơ̆ pơrjum, ồng Trương Hải Long, Củ tịc UɃÑZ càr Gia Lai sồr kwang đơng lam ală sở, gah lơh broă, ală kơnhoàl, thị xã, ƀòn dờng tàm càr tam klăc bal, pơgồp bal, lơh jăt mơ ală broă lơh nàng lơh gơs ală jơnau kờñ neh geh ai, kơnòl lơh sa mpồl bơtiàn nam 2022 càr dê: “Tơrgùm lơh jăt ală tơngu me gam lơyài pơn drờm mờ broă rơndăp lơh neh geh ai, ală broă bơsong kal ke, broă gam gơlời tàm gah: tă dia tàm kes priă, bơcri priă bơ̆t bơtàu tờm, ală rơndăp broă, broă brồ guh wơl lơh sa mpồl bơtiàn; gah lơh sơnơm, rơndăp broă ngui ù tàm ală tiah; lơh sa kă bro, kòp gơtờp tàm phan tam, phan ròng; broă tìs mờ adăt boh lam. Kwang atbồ ală sở, gah lơh broă, mpồl lơh broă, củ tịc UɃÑZ ală kơnhoàl, thị xã mhar lơh jăt ală kơnòl mờ Phó Củ tịc UɃÑZ càr neh đơs”.

Củ tịc UɃÑZ càr Gia Lai kung sồr ală kwang bàng tàm UɃÑZ càr, ală sở, gah lơh broă, mpồl lơh broă, ală kơnhoàl, thị xã, ƀòn dờng tam klăc bal, lơh ngan đơng lam, pơgồp bal, dong kờl bal tàm broă lơh jăt ndrờm bal ală kơnòl, broă lơh nàng lơh gơs ală jơnau kờñ, broă jào, kơnòl tơnguh bơtàu lơh sa mpồl bơtiàn, sền gàr kơl jăp bơta lơngăp lơngai dà lơgar tàm nam 2022.

Cau cih VOV Tây Nguyên-Cau mblàng Ndong Brawl