VOV4.K’ho - Càr Gia Lai geh bơta pràn nàng tơnguh bơtàu mhar mờ kơl jăp, mơya gam geh uă broă lơh ờ pràn, tàm hơ̆ bè gùng lòt ờ pràn là tiah kòl tờm lơh càr do ờ hềt tơnguh bơtàu. Do là dùl tàm ală tơngu me kwơ màng geh đơs tus tàm dơ̆ lơh broă pa do bơh Thủ tướng Cíñ phủ mờ kwang đơng lam tờm càr Gia Lai dê. Jăt mờ hơ̆, càr Gia Lai dan mờ Thủ tướng mờ ală ƀộ, gah lơh broă sền wơl, dong kờl càr gờñ lơh gùng ntoăt jờl Pleiku-Quy Nhơn, ai gùng pơn diang phan kă bro bơh tiah kơh bơnơm càr Gia Lai tus mờ anih ơhò ơm dà lềng.

                    Thủ tướng Cíñ phủ ồng Phạm Minh Chính geh jơnau đơs tàm dơ̆ lơh broă

Tàm dơ̆ lơh broă, Ƀí thư Tỉñ ủy Gia Lai ồng Hồ Văn Niên neh đơs tus ờ uă jơnau kờñ geh, jơnau dan tus mờ Dà lơgar, Cíñ phủ gơrềng tus broă bơcri priă lơh gùng lòt mờ ờ uă rơndăp broă lơh tờm tàm càr do dê. Kwơ màng, jơnau dan mờ Dà lơgar, Cíñ phủ ai priă bơcri tơngai bơh nam 2026 tus 2030 ha là jào ală ƀộ, gah lơh broă Dà lơgar dong kờl càr Gia Lai jòi geh mpồl lơh broă bal nàng gờñ lơh lài mờ nam 2030 gơwèt mờ ală rơndăp broă bơcri priă lơh gùng ntoăt jờl Pleiku-Quy Nhơn. Dan ală ƀộ, gah lơh broă dà lơgar dong kờl càr hòi jà priă ODA, bè: Rơndăp broă tơnguh bơtàu broă lơh gùng lòt ƀòn dờng Pleiku mờ ală tiah tờm tàm càr ngui priă bơh Ngân hàng Tơnguh bơtàu câu Á (ADB) mờ rơndăp broă bơcri priă lơh ală broă lơh bơtơ̆t rơbòng dà, gùng lòt ngui priă càn bơh Ngân hàng Dunia (WB).

Bơh nam 2020, 3 càr Gia Lai, Kon Tum, Bình Định neh lơh jơnau yal bal, dan mờ Thủ tướng sền wơl lơh gùng ntoăt jờl Pleiku-Quy Nhơn jòng 160 kơi sồ mờ 4 gah rơndeh ntoăt, ntoăt bal mờ gùng 19 tŭ do, khà priă bơcri kờp dŭ 56 rơbô tơmàn đong, tă bơh kes priă dà lơgar, priă càn ODA mờ hòi jà bơh uă gah tă priă ndai. Do geh là gơl gùng ƀuơn ngan nàng pơn diang phan đah ală càr đah tô Tây Nguyên, đah jum lơgar Lào, tiah đah tô măt tơngai lik lơgar Campuchia mờ anih ơhò ơm dunia Quy Nhơn. Nàng kờñ geh ngui ală bơta niam tơnguh bơtàu bơh càr Gia Lai dê, ồng Hồ Văn Niên, Ƀí thư Tỉñ ủy Gia Lai dan mờ Dà lơgar, Cíñ phủ ai priă bơcri tơngai bơh nam 2026 tus 2030 ha là jào ală gah, ƀộ lơh broă dà lơgar in dong kờl càr Gia Lai jòi geh mpồl lơh broă nàng gờñ lơh rơndăp broă lài mờ nam 2030: “Bol añ kung neh cri bơyai mờ ală kwang bàng tàm càr Bình Định, 2 càr geh nùs nhơm lơh ngan lơh gùng ntoăt jờl do. Di lah đơs gùng ntoăt jờl tàm dà lơgar, Tây Nguyên ờ hềt geh thơ̆k gùng ntoăt jờl lơi. Do là hoàc huơr uă ngan ai ală càr Tây Nguyên. Bol añ kơlôi là, di lah ală broă lơh, tàm hơ̆ uă ngan là broă lơh gùng lòt ờ geh sền gròi bơcri priă, tàm hơ̆ uă ngan là gùng ntoăt jờl den càr Gia Lai đơs is, Tây Nguyên đơs bal mờ ală càr jăt gah dà lềng tiah tàm gùl lơgar, tiah đah jum măt tơngai lik dà lơgar, tiah đah jum măt tơngai mŭt dà lơgar mờ ală càr tiah đah tô dà lơgar geh ờ pràn ngan”.

                              Koèl kơh An Khê- tiah nhàr đah càr Gia Lai mờ càr Bình Định

Đơs tàm dơ̆ lơh broă, Thủ tướng Cíñ phủ ồng Phạm Minh Chính neh dờp mờ pơn jờng ală broă lơh ngan bơh Đảng ƀộ, gơnoar atbồ bal mờ làng bol ală kòn cau tàm càr neh lơh geh tàm tơngai do. Bơdìh hơ̆ tai, Thủ tướng Cíñ phủ ồng Phạm Minh Chính neh ai tơngŏ ală broă gam ờ pràn, ală kal ke pal geh jơnau pơlam nàng càr Gia Lai tơnguh bơtàu mhar mờ kơl jăp, Thủ tướng đơs tờm: “Broă lơh jŏ jòng gam ờ pràn, gam kal ke, mờ broă tơrbŏ bal broă lơh jŏ jòng do nàng tàm Tây Nguyên geh dà lềng, nàng càr Gia Lai geh dà lềng gam kal ke ngan. Mìng geh gùng 19, gùng 19 den ờ ơnàng bè do, tơnguh bơtàu broă lơh gùng bè lơi nàng ai càr Gia Lai tơrbŏ bal mờ ală càr gùt dar, pin dờn brồ guh is bơh tàm bơta pràn is neh geh mơya ờ hềt uă. Añ sồr ală kwang bàng brồ guh pràn kơl dang rơlao tai, pin dờn rơlao tai mờ kơl jăp rơlao tai nàng he tơnguh. Tŭ do, mìng geh lơh ngan, lài ngan là nùs nhơm, dơ̆ bàr là pal lơh ngan uă rơlao tai bè broă lơh pràn rơlao tai nàng rơwah broă lơh geh geh tơrgùm lơh broă lơi gơs broă hơ̆”.

Thủ tướng tam pà mờ càr Gia Lai ờ hềt tơnguh bơtàu ndrờm bal mờ bơta geh, bơta kwơ, tàm hơ̆, tơngu me bè broă lơh jŏ jòng, broă tơrbŏ bal jŏ jòng gam kal ke, là bơta kờl pal geh bơsong. Bè jơnau dan lơh gùng ntoăt jờl Pleiku-Quy Nhơn, dà lơgar bal mờ ală ƀộ, gah lơh broă geh lơh bal mờ ală càr. Thủ tướng Cíñ phủ ồng Phạm Minh Chính sồr lài jơh càr Gia Lai pal tơnguh nùs nhơm lơh is, sền is nàng lơh mờ broă lơh bal dà lơgar bal mờ cau dùl nă să: “Jào càr Gia Lai là anih lơh broă dà lơgar geh gơnoar kơlôi sơnơng bơcri priă lơh gùng ntoăt jờl bơh càr Gia Lai tus càr Bình Định mờ lik tus anih ơhò ơm Quy Nhơn, càr Bình Định mờ bơh mpồng nhàr dà lơgar dunia Lệ Thanh càr Gia Lai mờ broă lơh bal dà lơgar bal mờ cau dùl nă să lơh is lơh bal. Ală kwang bàng geh dùl bơnah priă tă nàng tơm ntrờn ù tiah, gam tai dà lơgar hòi jà, jòi cau lơh broă bal mờ ală kwang bàng. Geh ring bal, lơh sơlơ gờñ sơlơ niam, ờ geh kơnờm bal. Di lah he ai priă dà lơgar den pal tơnơ̆ mờ nam 2030, geh tŭ tơnơ̆ mờ nam 2045 kung ờ geh lơh sơl. Mơya ngui priă lơh broă bal dà lơgar mờ cau dùl nă să den ală kwang bàng pal tềm pềr priă”.

Bal mờ ală jơnau đơs bè broă lơh gùng lòt, tàm dơ̆ lơh broă mờ Thủ tướng Cíñ phủ ồng Phạm Minh Chính, Ƀí thư Tỉñ ủy Gia Lai ồng Hồ Văn Niên kung đơs tus broă lơh bơtơ̆t rơbòng dà Ia Mơr, kơnhoàl Cư̆ Prông. Mùl màl jăt jơnau kờp dŭ tus tŭ do neh geh rơlao 4 rơbô 700 lồ brê hòn is pal tam gơl, dan Cíñ phủ yal mờ Quốk hội pơrjum dơ̆ 3 bè broă lơh jăt rơndăp broă ù tiah. Bal mờ hơ̆, càr kung dan Thủ tướng Cíñ phủ ai tam gơl bă ù tam kao su gơtìp chơ̆t mờ ờ hòn gơs niam nàng tam ală bơta phan tam ndai; mờ kơlôi sơnơng ală kơ cế, broă lơh di pal mờ bơta tŭ do nàng pơn jăt tai chồl pràn tơnguh bơtàu lơh sa mpồl bơtiàn, gàr niam bơta lơngăp lơngai dà lơgar, broă kòn cau, jăt yàng, bơ̆t bơtàu mpồl lơh broă cíñ trị tiah Tây Nguyên.

Cau mblàng Ndong Brawl