Tàm qúi I nam 2023, gơguh kờp jơh phan bơna lơh geh tàm càr Gia Lai dê kờp dŭ geh 5,91%, tơm priă dia dà lơgar geh mờr 1 rbô 700 tơmàn đong. Priă ală gah lơh gơlik phan bơh lơh sa sươn sre, brê bơnơm, lơh sa mờ măy mok mờ drơng broă ndrờm lơh geh cồng nha uă. Bulah bè hơ̆, jơh qúi I, càr Gia Lai ai priă bơcri dà lơgar dê rơ̆p pa geh mờr 6% lơm tài bơh gơkòl tàm broă ai ù, lơyài lơh jăt ală sră nggal lam lơh jăt rơndăp broă lơh; bơta lơh tìs adat sền gàr, tam pa mờ tam wơl brê kung gam gơbàn kal ke sơl.

Tàm pơrjum do, ồng Trương Hải Long, Phó Ƀí thư Tỉñ ủy Gia Lai, mơkung là Củ tịc Ủy ƀan Ñân zân càr Gia Lai dê sồr ală sở, ngàñ mờ ală tiah tơrgùm tă bơsong kal ke, lơh jăt niam ală broă lơh bơtàu tơnguh wơl lơh sa, 3 broă lơh Jơnau kờñ Dà lơgar mờ ală broă lơh lơh broă, kơrnoăt mìng dùl tơngume bơh Tỉñ ủy dê.