Mò Trương Thị Ngọc Ánh, Phó Củ tịc Ủy ƀan Mặt trận Dà lơgar Việt Nam tus bal mờ đơs tàm Ngai chờ. Là ù tiah kwơ màng, tờm ngan bè sền gàr Dà lơgar, lơngap lơngai bơh càr Kon Tum dê, kơnhoàl Đăk Hà kờp jơh bă ù geh is rlau 84 rơbô 500 lồ mờ khà kờp làng bol rlau 87 rơbô nă cau mờ geh 18 jơi bơtiàn kòn cau oh mi ơm kis bal.

Gĭt wă loh làng bơta kwơ màng bơh broă lơh bơt bơtàu Srơh jơh gùt làng bol sền gàr lơngap lơngai dà lơgar là pơgồp bơnah gàr niam lơngap lơngai, rơndăp tăp sèng, drơng ai broă bơtàu tơnguh lơh sa, niam chài, mpồl bơtiàn bơh càr dê, tơngai pa do, kơnhoàl Đăk Hà neh lam lơh 188 dơ̆ mblàng yal bè srơh jơh gùt làng bol sền gàr lơngap lơngai dà lơgar ai rlau 37 rơbô 400 dơ̆ cau in. Đơs tàm Ngai chờ mò Trương Thị Ngọc Ánh, Phó Củ tịc Ủy ƀan Mặt trận dà lơgar Việt Nam sồr gơnoar atbồ, mpồl lơh broă geh gơnoar, mặt trận mpồl cau ală kấp kơnhoàl Đăk Hà, càr Kon Tum dê pơn jat tai bơtàu tơnguh, lơh pràn rlau tai Srơh jơh gùt làng bol sền gàr lơngap lơngai Dà lơgar. Nàng srơh jơh gùt làng bol sền gàr lơngap lơngai Dà lơgar ngai sơlơ mŭt lơh uă, niam mờ geh ngan.