Mìng is tàm 3 ngai pơrlòng, tơl nă kơnòm bơsram jơi bơtiàn dồ êt nă cau mờ kơnòm pơrlòng geh rài kis hìu bơnhă kal ke tơl nă oh rơp geh dong kờl bơh 250 tus 300 rbô đông. Bal mờ hơ̆, Tỉñ đoàn càr Kon Tum kung neh lơh ală mpồl dong kờl is tàm 12 anih pơrlòng, rơcang dong kờl ală oh anih ơm mờ rơndeh rơndồ lòt rê.

Dơ̆ pơrlòng jơh bơsram kâp 3 nam do, càr Kon Tum geh rlau 5 rbô nă kơnòm bơsram cih mat tus bal pơrlòng, tàm hơ̆ geh rlau 1 rbô 700 nă kơnòm pơrlòng jơi bơtiàn dồ êt nă cau. Broă dong kờl kơnòm pơrlòng jơi bơtiàn dồ êt nă cau bal mờ rlau 1 rbô 100 nă kơnòm bơsram geh rài kis hìu bơnhă kal ke bơsram wơl jơnau git wă kung bè tàm ală ngai geh lơh pơrlòng geh ală kâp gơnoar atbồ, mpồl bal mờ gah bơto bơsram càr Kon Tum sền gròi uă ngan.