VOV4.K’ho- Ủy ƀan Ñân zân càr Kon Tum pa geh sră sồr Sở Giao thông Vận tải càr Kon Tum lơh mhar tŭ tơngai lơh Rơndăp broă lơh lơh niam wơl gùng rơndeh dờng 24 tàm ù tiah càr Kon Tum.

Lơh Rơndăp broă lơh lơh niam wơl gùng rơndeh dờng 24 gơl lòt gan kơnhoàl Kon Plông

Jăt mờ hơ̆, Ủy ƀan Ñân zân càr Kon Tum sồr Sở Giao thông Vận tải càr Kon Tum drơng lơh, pơgồp bal mờ ală anih lơh broă geh gơrềng sùm jăt sền, lòt sền anih lơh, pơn jăt tai sồr, sồr ngan ală cau lơh gùng sơlơ tơrgùm bơtơl măy mok, rơndeh rơndồ, phan ngui, cau lơh broă; ngui niam jơh trồ tiah niam, lam lơh tơnguh dơ̆, tơnguh mpồl lơh mhar tŭ tơngai lơh nàng kờñ lơh di tơngai neh geh tam gơl mờ ai priă jền jơh broă rơndăp lơh priă neh jàu nàng lơh gơs di tơngai mờ bơta niam. Sở Giao thông Vận tải geh kơnòl sồr bơto pơlam jăt sền, ai tơl cau lơh broă tàm anih lơh broă, sơlơ gròi sền kràñ bè bơta niam broă lơh nàng lơh jăt di jơnau sồr bè bơta chài bơh rơndăp broă lơh dê; gròi sền kràñ bè tŭ tơngai lơh di tŭ bơsong halà yal jơnau dan, jơnau sồr ală broă lơh bơsong gơwèt mờ ală jơnau cau lơh gùng ờ lơh niam broă mờ lơyài tơngai lơh.

Cau mblàng Lơ Mu K’Yến