VOV4.K’ho- Drim ngai 02/3, tàm ƀòn dờng Kon Tum, Ủy ƀan Ñân zân càr Kon Tum mờ Ủy ƀan gơnoar atbồ càr Attapư, lơgar Lào neh geh dơ̆ lơh broă, ring bal broă lơh pơgồp bal bơyai lơh pơlam tàp dong kờl rềs àr tŭ gơlik geh dà kŏ dà cò mờ tơrlah ù gơ rềng tơn tus làng bol tàm tiah rềp nhàr lơgar đah 2 càr. Đơs tàm dơ̆ lơh broă, ồng Nguyễn Hữu Tháp, Phó Củ tịc Ủy ƀan Ñân zân càr Kon Tum mờ ồng Bun-sợt Sệt-thi-lạt, Phó Kwang atbồ càr Attapư yal bè broă bơtàu tơnguh lơh sa- mpồl bơtiàn bơh 2 càr dê mờ jơnau gơ lời wơl mờ trồ tiah lơh aniai, ồs sa lơh gơlik tàm nam pa do.

Tàm dơ̆ lơh broă, 2 gah ring bal mờ kĭ sră cih kah lơh broă bal lam lơh jat geh cồng nha Nghị địñ thư bè dong kờl rềs àr, bơsong trồ tiah lơh aniai đah 2 càr. Tàm nam 2022, 2 càr Kon Tum mờ Attapư geh pơgồp bal bơyai lơh pơlam tàp broă lơh dong kờl rềs àr, dà kŏ dà cò mờ tơrlah ù gơlik geh tàm tiah nhàr lơgar rềp bal 2 càr. Anih bơyai lơh tàm xã Pờ Y, kơnhoàl Ngọc Hồi, càr Kon Tum.

Cau mblàng K’Duẩn