VOV4.K’ho - Drim òr (02/06), tàm kơnhoàl Đăk Hà, Tỉñ đoàn Kon Tum bơyai lơh lik lơh broă ơruh pơnu lơh broă nùs nhơm dong kờl kàl rơlô bơkang nam 2022. Dơ̆ lik lơh broă do geh ală broă lơh bè: Đoàn viên, ơruh pơnu tus bal bơ̆t bơtàu ƀòn lơgar pa, sền gàr tiah kis, rơcang sơndră mờ tam gơl trồ tiah; Drơng gàr ai kơnòm pa tào, kơnòm dềt in, tus bal dong kờl làng bol gơtìp aniai tài bơh kòp Kovid-19; Lam sồr bơto pơlam adăt ơruh pơnu; bơyai lơh tơmŭt đoàn viên, cau pa in...
Đoàn ơruh pơnu tus bal mờ dơ̆ lik lơh broă
Tàm dơ̆ lik lơh broă, Tỉñ đoàn Kon Tum pà 50 pò phan ai ală kơnòm bơsram gơtìp kal ke bơsram jăk in; Pà kơl dung niam ờ do ờ dă tàm rài kis ai 10 hìu ơruh pơnu kòn cau, cau jăt yàng gơtìp kal ke in; Jào pà 1 broă lơh sơndră mờ siồ siă đù tơrgùm siồ siă tàm ƀòn lơgar mờ broă lơh suơn tam phan tă geh priă, gơdờp mờ tam gơl trồ tiah; Pà 1 rơbô li dà toh ai kơnòm dềt geh rài kis gơtìp kal ke; Pơn jờng 9 mpồl mờ 9 nă cau neh geh cồng nha jăk chài tàm broă lơh jăt ală broă lơh Nhai ơruh pơnu nam 2022.
Drim ngai 02/06, tàm ƀòn dờng Pleiku, Tỉñ đoàn Gia Lai bơyai lơh “Dơ̆ ai cau lòt lơh broă Broă lơh ơruh pơnu lơh broă dong kờl is kàl rlô bơkang nam 2022” mờ bơta tus bal bơh 350 nă đoàn viên ơruh pơnu dê. Broă lơh nam do, Ƀan Thường vụ Tỉñ đoàn Gia Lai neh lơh 5 mpồl ơruh pơnu lơh broă dong kờl is, ai cau lòt lơh broă lơh jăt ală broă lơh nùs nhơm niam sùm tàm 3 nhai rlô bơkang. Ală broă lơh, broă bơ̆t bơtàu, bơnah broă loh làng tơrgùm tàm ală xã tiah nhàr lơgar mờ ală xã, ƀòn gam lơh ngan lơh geh tơl jơh jơnau sồr bơ̆t bơtàu ƀòn lơgar pa tàm nam 2022. Broă lơh do, rơnàng kơnòm să Gia Lai lơh ngan lơh niam wơl mờ lơh pa 15 kơi sồ gùng lòt ƀòn lơgar; tam pa 150 rbô tờm chi; lơh 3 nơm hìu kờñ gơboh kòn bơnus, hìu bơta nđàc; Kham, pơlam sa phan bơkah tơl pràn, sền gàr pràn kơldang să jan, sàng goh ờdo ờdă phan sa ai bơh 1 rbô nă làng bol in; lơh pa mờ lơh niam wơl 8 nơm hìu jă brê hìu bơsram; pơlam bơta gĭt wă sơnđờm mŭt lơh broă ai ơruh pơnu in.
Cau mblàng Ndong Brawl-Lơ Mu K' Yến
Viết bình luận