Tàm kờp jơh rlau 56 rbô lồ brê gơ dă jòng tàm ù tiah 2 kơnhoàl: Sa Thầy mờ Ngọc Hồi, càr Kon Tum, Mpồl ătbồ Brê dà lơgar Chư Mom Ray gĭt nền pơgăp 20 rbô lồ, tàm hơ̆ geh 250 lồ brê tam gam geh pơhìn gơtìp ồs sa uă ngan.

Ồng Đào Xuân Thủy, Kwang ătbồ Mpồl ătbồ Brê do pà gĭt, mpồl gam pơn jăt tai hòi tơrgùm, gàr sùm uă ngan rlau jơh mpồl cau rơcăng lài sơndră wơl ồs sa brê, ngan là tàm ală tiah brê geh ƀlàng ñhơ̆t, brê bơrlŭ bal mờ sơkàr, mờ đơr mờ brê tam. Mpồl sền gàr brê tơn geh 72 nă, geh ai lơh broă tàm 14 trạm ƀòn lơgar mờ 21 anih drơng sền. Pơgồp bal mờ mblàng yal, hòi jà, tơngkah làng bol bañ ngui ồs, ờ gŏ di chu tơdao mìr tàm tŭ jiơ uă cau chu nàng tơrmù ƀà uă ngan ală jơnau pơhìn ồs sa. Mpồl ngui Flycam nàng jăt sền pah ngai gŏ gờñ, bơh ngài ală jơnau pơhìn nàng bơsong ồs sa di tŭ.