VOV4.K’ho- Càr Kon Tum geh broă lơh kràñ cê jơh nùs tơnơ̆ geh jơnau yal bơh VOV dê bè ală bơta lơh tìs tàm tŭ tơnhào bràs tàm tiah tơnhào phan kwơ tàm ù tàm dà dờng Pô Kô, gơl gơwèt ƀòn Kà Nhảy, xã Dăk Nông, kơnhoàl Ngọc Hồi mờ tàm dà dờng Đăk Pxi, gơl gơwèt thôn 7, xã Đăk Pxi, kơnhoàl Đăk Hà.

Mpồl lơh sa kă bro bơ̆t gùng tàm dà dờng Đăk Pxi nàng tơnhào bràs mơya Ủy ƀan Ñân zân xã Đăk Pxi ờ gĭt mờ Phòng Tài nguyên mờ Môi trường kơnhoàl Đăk Hà mìng bơto tơngkah lơm

 Pal sền gròi ngan là Sở Tài nguyên mờ Môi trường càr Kon Tum neh dờp wơl sră nggal sồr ai gơnoar tơnhào phan kwơ tàm ù bràs, lŭ rơđeh, ngui lơh phan bơt bơtàu bè ờs tàm tiah tơnhào phan kwơ tàm ù tàm dà dờng Đăk Pxi, gơl gơwèt thôn 7, xã Đăk Pxi, kơnhoàl Đăk Hà. Ngan ngồn tàm sră nggal pơyoa Mpồl lơh broă ală gah lòt sền, sền gròi broă lơh tơnhào bràs, lŭ rơđeh tàm ù tiah càr Kon Tum, Sở Tài nguyên mờ Môi trường, Cơldŭ lơh broă Ủy ƀan Ñân zân càr  Kon Tum jàu Mpồl lơh broă in đơng lam, pơgồp bal mờ Sở Giao thông Vận tải lòt sền, lơh loh tơngume cih yal bơh gah lơh băo dê, lơh glài ală cau lơh tìs (dilah geh) jat gơnap gơnoar mờ jơnau cih bơh adat boh lam dê.

Cau mblàng K’Hạnh